Jeshi la Sudan limefanikiwa kurejesha udhibiti wa majengo ya ikulu yaliyopo katika jiji kuu la Khartoum, leo hii. Hii ni baada ya wanamgambo wa Kikosi cha Msaada wa Haraka (RSF) kuyachukua majengo hayo katika siku za mwanzo za vita, karibu miaka miwili iliyopita.
Akizungumza kupitia televisheni ya taifa, msemaji wa jeshi la Sudan, Nabil Abdallah, ameeleza kuwa vikosi vya serikali vimefanikiwa kuvuruga vikosi vya RSF na kuteketeza silaha nyingi za kivita zilizokuwa mikononi mwa wapiganaji hao.
Mapigano makali yameshuhudiwa kati ya pande hizo mbili kabla ya jeshi la Sudan kupata ushindi mkubwa, ambao unachukuliwa kuwa moja ya mafanikio makubwa zaidi tangu kuanza kwa vita mwezi Aprili 2023.
Majengo ya ikulu, yaliyopo katikati ya mji mkuu Khartoum, yamekuwa uwanja wa mapigano makali baina ya vikosi vya serikali na wanamgambo wa RSF katika miezi ya hivi karibuni.
Tukio hili ni muhimu sana kutokana na ukweli kwamba Ikulu ya nchi ni kitovu cha mamlaka na ishara ya taifa. kurejeshwa kwa udhibiti wa eneo hilo kwa Jeshi la Sudan ni hatua muhimu katika mzozo unaoendelea nchini humo.