Mshauri mkuu wa Kiongozi Mkuu wa Iran, Ayatollah Ali Khamenei, amedai kuwa Iran inaweza kuanza mchakato wa kutengeneza silaha za nyuklia ikiwa Marekani itaishambulia.
Akizungumza katika mahojiano na televisheni ya taifa, Ali Larijani, ambaye ni mshauri wa Khamenei, alisema, "Hatuelekei kwenye silaha za nyuklia, lakini ikiwa wao (Marekani) watafanya hatua mbaya kuhusu suala la nyuklia la Iran, basi Iran itakuwa na wajibu wa kuelekea upande huo kwa ajili ya kujilinda."
Aliongeza, "Iran haitaki kufanya hivyo, lakini haitakuwa na chaguo jingine."
Larijani alionya kuwa "iwapo Marekani itafanya mashambulizi ya anga wakati wowote, moja kwa moja au kupitia Israel, itasababisha Iran kufanya uamuzi tofauti."
Matamshi haya ya Larijani yanakuja baada ya Khamenei mwenyewe kusema kuwa Iran itajibu vikali iwapo Marekani itafanya mashambulizi.
Katika hotuba yake wakati wa Eid al-Fitr (sikukuu ya kidini inayoashiria mwisho wa mwezi mtukufu wa Ramadhani), Khamenei alizungumzia matamshi ya hivi karibuni ya Rais Trump kuhusu uwezekano wa kufanya mashambulizi, akisema, "Wanatishia kufanya uovu."
Khamenei alisisitiza, "(Marekani) ikiwa itafanya hivyo, basi bila shaka itapokea majibu makali."
Naye msemaji wa Wizara ya Mambo ya Nje ya Iran, Esmaeil Baghaei, kupitia mtandao wa kijamii X (zamani Twitter), alisema, "Tishio la wazi la kushambulia na mkuu wa nchi ni dharau kubwa kwa amani na usalama wa kimataifa." Aliongeza kuwa "ikiwa Marekani itachagua njia ya ghasia, basi matokeo yake yatakuwepo."
Kamanda wa Kikosi cha Anga cha Jeshi la Walinzi wa Mapinduzi ya Kiislamu (IRGC), Amirali Hajizadeh, akiongea na televisheni ya taifa, alisema, "Marekani ina angalau kambi kumi au zaidi zinazozunguka Iran na ina wanajeshi elfu hamsini katika eneo hilo." Alionya, "Yeyote aliye ndani ya nyumba ya kioo hapaswi kumtupia mtu yeyote mawe."
Awali, Rais Trump, katika mahojiano na NBC News, alisema kuwa "maafisa wa Marekani na Iran wanafanya mazungumzo." Aliongeza, "Kutakuwa na mashambulizi ya anga ikiwa Iran haitakubali mkataba wa nyuklia. Itakuwa katika kiwango ambacho hawajawahi kukiona."
Trump pia alisema, "Ikiwa hawatakubali mkataba, kuna uwezekano nikaweka ushuru wa forodha wa awamu ya pili, kama nilivyofanya miaka minne iliyopita."