Katika hatua ya kidiplomasia isiyo ya kawaida, Waziri Mkuu wa Israel, Benjamin Netanyahu, ameripotiwa kumpigia simu Waziri Mkuu wa Qatar, Sheikh Mohammed bin Abdulrahman Al Thani, na kumuomba msamaha rasmi kufuatia shambulio la anga lililofanywa na jeshi la Israel nchini humo. Tukio hili la kushangaza lilifanyika wakati Netanyahu akiwa katika mkutano wa kilele na Rais wa Marekani, Donald Trump, Ikulu ya White House, kwa mujibu wa taarifa ya kituo cha habari cha CNN iliyotolewa jana, Septemba 29.
Msamaha huo unahusu shambulio la anga lililotokea Septemba 9, ambapo jeshi la Israel lililenga jengo moja katika mji mkuu wa Qatar, Doha, kwa madai ya kuwalenga maafisa wa ngazi za juu waliokuwa wamejihifadhi huko. Shambulio hilo lilizua mvutano mkali wa kidiplomasia, huku Qatar na mataifa mengine ya Kiarabu yakilaani vikali kitendo hicho na kukiita ni uhalifu na ukiukwaji wa sheria za kimataifa.
Kwa mujibu wa wachambuzi wa CNN, muda na mazingira ya Netanyahu kuomba radhi—akiwa pembeni ya Rais Trump—haikuwa bahati mbaya. Inatajwa kuwa ni shinikizo la kisiasa lililolenga kuishawishi Qatar kukubali na kuunga mkono mpango mpya wa amani kwa ajili ya Gaza, ambao ulitangazwa na viongozi hao wawili mara baada ya mkutano wao.
Trump na Netanyahu walizindua mpango wa amani wenye vipengele 21, unaolenga kuleta mwarobaini wa kudumu katika mzozo wa Gaza. Baadhi ya vipengele muhimu vya mpango huo ni pamoja na: makubaliano ya kubadilishana mateka, ambapo Hamas itawaachia raia wa Israel inaowashikilia na Israel itawaachia wafungwa wa Kipalestina; na kuundwa kwa ukanda usio na shughuli za kijeshi Gaza, ambapo Hamas itasalimisha silaha zake na jeshi la Israel litaondoka katika eneo hilo.
Baada ya vita, mpango huo unapendekeza kuundwa kwa chombo cha kimataifa kitakachojulikana kama "Kamati ya Amani" kwa ajili ya kusimamia ujenzi mpya wa Gaza. Rais Trump alitangaza kuwa yeye mwenyewe atakubali kuwa mwenyekiti wa kamati hiyo, na kuongeza kuwa mataifa ya Kiarabu yasiyofungamana na upande wowote yatasaidia katika uundwaji wake.