Kundi la wanamgambo wa Kipalestina la Hamas linafanya mazungumzo na nchi za Misri na Qatar, ambazo zinafanya upatanishi, kwa lengo la kufufua mazungumzo ya kusitisha mapigano katika Ukanda wa Gaza.
Shirika la habari la AFP liliripoti hayo mnamo tarehe 27, likinukuu chanzo cha Kipalestina kilicho karibu na Hamas.
Chanzo hicho, ambacho kilitaka kutotajwa jina, kilisema kuwa "mkutano kati ya ujumbe wa Misri unaoshughulikia mazungumzo na ujumbe wa Hamas ulianza jioni hii huko Doha, Qatar."
Chanzo hicho kiliongeza kuwa wasuluhishi kutoka Qatar pia wanashiriki katika mazungumzo hayo.
Kulingana na chanzo hicho, mazungumzo hayo yanazingatia kusitisha mapigano kuanzia mwisho wa mwezi huu, unaoadhimisha Sikukuu ya Eid al-Fitr, hadi Pasaka mnamo Aprili 20. Lengo lingine ni kuhakikisha kuingia kwa misaada ya kibinadamu katika Ukanda wa Gaza.
Chanzo hicho kilieleza kuwa "wasuluhishi wanafanya mazungumzo ya kina na pande zote ili kuimarisha usitishaji mapigano na kuendelea na hatua ya pili ya makubaliano."
Chanzo hicho kilisema kuwa Hamas imeonyesha utayari wa kujibu "vyema" kwa pendekezo lolote ambalo linaweza kusababisha kusitishwa kwa mapigano.
Hata hivyo, chanzo kingine cha Kipalestina kilicho karibu na Hamas kililiambia shirika hilo la habari kuwa licha ya mazungumzo hayo, bado hakujakuwa na mafanikio yoyote kuhusu kuanza tena kwa usitishaji mapigano.
Chanzo hicho kilisema kuwa "makubaliano ya kubadilishana mateka na kusitisha mapigano yanawezekana," lakini "mafanikio yake yanategemea idhini ya [Israel] na nia yao ya kutovuruga mchakato huo."
Israel na Hamas walishindwa kuongeza muda wa usitishaji mapigano wa awamu ya kwanza, ambao ulianza Januari 19, baada ya kumalizika.
Tangu wakati huo, Israel imeanzisha tena mashambulizi makubwa ya anga katika Ukanda wa Gaza na inafanya operesheni zinazolenga kuwaua viongozi wakuu wa Hamas.
Hamas imeonya kuwa "kila mara wanapojaribu kuwarejesha mateka kwa nguvu, watarudi wakiwa ndani ya majeneza."