Baada ya ushindi wa muungano wa vyama vya kihafidhina Christian Democratic Union (CDU) na Christian Social Union (CSU) katika uchaguzi wa Bunge la Shirikisho la Ujerumani (Bundestag), macho sasa yanamwelekea Friedrich Merz (70), ambaye anatarajiwa kuwa Kansela mpya wa Ujerumani. Merz, ambaye alikuwa mpinzani wa kisiasa wa Angela Merkel, anarejea madarakani baada ya miaka mitatu ya uongozi wa Olaf Scholz.
Safari ya Kisiasa ya Friedrich Merz
Merz alizaliwa mwaka 1955 katika jimbo la North Rhine-Westphalia katika familia ya Kikatoliki yenye misimamo ya kihafidhina. Aliingia katika siasa kupitia chama cha vijana cha CDU na mwaka 1989, akiwa na umri wa miaka 33, alichaguliwa kuwa mbunge wa Bunge la Ulaya. Mwaka 1994, alijiunga na Bundestag, ambako alijijengea sifa kama mtaalamu wa sera za kifedha.
Moja ya kauli zake maarufu, aliyotoa mwaka 2004, ni kwamba mfumo wa kodi wa Ujerumani unapaswa kuwa rahisi kiasi kwamba mtu anaweza kuuhesabu akiwa ameshikilia glasi ya bia.
Hata hivyo, alijikuta nje ya ulingo wa siasa baada ya kushindwa kwenye mapambano ya ndani ya chama dhidi ya Merkel. Mwaka 2000, Merz alishindwa na Merkel katika uchaguzi wa uongozi wa CDU. Tofauti kati yao ilikuwa dhahiri: Merkel, akiwa mwanamke wa Kiprotestanti mwenye mtazamo wa wastani, alitofautiana na Merz, ambaye ni mhafidhina wa kitamaduni. Kufuatia kushindwa, mwaka 2002 aliondolewa kutoka nafasi yake kama kiongozi wa wabunge wa CDU, na mwaka 2009 aliachana na siasa kabisa.
Baada ya kuondoka kwenye siasa, alijiunga na kampuni ya sheria ya kimataifa Mayer Brown na kujiimarisha kifedha. Kwa mujibu wa gazeti la Handelsblatt, alikuwa miongoni mwa watu matajiri kutokana na kazi zake katika sekta ya biashara na sheria. Ripoti ya CNN ilieleza kuwa historia yake ya mafanikio ya kibiashara inaweza kuwa moja ya sababu zilizomvutia wapiga kura, hasa katika kipindi ambacho uchumi wa Ujerumani umekuwa dhaifu kwa miaka miwili mfululizo.
Merz alirejea tena katika siasa mwaka 2018 wakati Merkel alipokuwa akijiandaa kung’atuka. Aliamini kuwa kwa kuchukua msimamo mkali juu ya masuala ya uhamiaji na uhalifu, angeweza kuzuia kupanda kwa umaarufu wa chama cha mrengo mkali wa kulia, Alternative for Germany (AfD). Baada ya kushindwa mara mbili, mwaka 2022 alifanikiwa kushinda uongozi wa CDU, akijaribu kuirejesha chama hicho kwenye misingi yake ya kihafidhina na kuachana na urithi wa Merkel.
Sera na Mtazamo wa Merz
Merz amekuwa akipinga vikali sera za Merkel, hasa kuhusu wahamiaji. Mwaka 2019, katika mahojiano na kituo cha ZDF, alitaja uongozi wa Merkel kama “wingu la ukungu” na kuuita uamuzi wake wa 2015 wa kupokea wakimbizi kuwa “makosa makubwa.”
Ikiwa atakuwa Kansela, wachambuzi wanaamini kuwa sera za Ujerumani kuhusu uhamiaji zitabadilika kwa kiasi kikubwa. Kwa mujibu wa jarida la Der Spiegel, Merz anashikilia msimamo mkali kuhusu uhamiaji na anataka kupunguza uhamiaji haramu kwa kuzuia waombaji hifadhi wanaowasili kupitia mataifa mengine ya Umoja wa Ulaya (EU) kuingia Ujerumani.
Katika masuala ya kimataifa, gazeti la New York Times (NYT) linaeleza kuwa Merz anaweza kuwa na msimamo unaofanana zaidi na Donald Trump kuliko Kansela wa sasa, Olaf Scholz. Wanaamini kuwa anaweza kushinikiza Ulaya ijitegemee zaidi katika masuala ya ulinzi, mtazamo unaoendana na sera za Trump ambazo zinataka Ulaya kujibeba zaidi katika matumizi ya kijeshi badala ya kutegemea Marekani.
NYT pia linamtaja Merz kama kiongozi mwenye ujasiri na anayeamini kuwa Ujerumani inapaswa kuchukua nafasi kubwa zaidi katika masuala ya Ulaya na dunia. Hii ni tofauti na Scholz, ambaye amekosolewa kwa tahadhari yake katika uamuzi wa kisera.
Mustakabali wa Ujerumani Chini ya Merz
Ikiwa Merz atakuwa Kansela, Ujerumani huenda ikashuhudia mabadiliko makubwa katika sera zake za ndani na nje. Kupitia msimamo wake wa kihafidhina na wa soko huria, Merz anaweza kuleta mabadiliko katika sera za uchumi, uhamiaji na ushirikiano wa kimataifa.
Kwa sasa, ulimwengu unasubiri kuona ikiwa ataweza kutekeleza mipango yake, hasa katika mazingira ambayo Ujerumani inakabiliwa na changamoto za kiuchumi, ongezeko la uhamiaji, na ushindani wa kisiasa ndani ya Umoja wa Ulaya.