Wabunge saba wa Bunge la Ulaya (MEPs) kutoka Kamati ya Maendeleo wanatarajia kufanya ziara nchini Tanzania kuanzia Februari 24 hadi 26, 2025, kwa lengo la kutathmini athari za uwekezaji wa Umoja wa Ulaya (EU) nchini na ufanisi wa mkakati wa *Global Gateway*.
Ujumbe huo utaongozwa na Mwenyekiti wa Kamati ya Maendeleo ya Bunge la Ulaya, Barry Andrews, na utatembelea miradi mbalimbali inayohusiana na maji na usafi wa mazingira, maendeleo ya uchumi, miundombinu ya bandari, usawa wa kijinsia, elimu, na uvuvi endelevu. Ziara hiyo inawapa wabunge fursa ya kuona jinsi fedha za EU zinavyotumika katika miradi inayotekelezwa nchini Tanzania.
Pia, wajumbe wa ujumbe huo watakutana na viongozi mbalimbali wa serikali akiwemo Spika wa Bunge la Tanzania na Rais wa Umoja wa Mabunge Duniani (IPU), Dk. Tulia Ackson; Waziri wa Maendeleo ya Jamii, Jinsia, Wanawake, Watoto na Makundi Maalum, Dk. Dorothy Gwajima; Waziri wa Nchi, Ofisi ya Rais – Mipango na Uwekezaji, Prof. Kitila Mkumbo; na Naibu Waziri wa Mambo ya Nje na Ushirikiano wa Afrika Mashariki, Cosato Chumi.
Mbali na viongozi hao wa serikali, wajumbe wa EU pia watakutana na wawakilishi wa mashirika ya Umoja wa Mataifa, benki za maendeleo, sekta binafsi, mashirika ya kitaifa ya maendeleo, na asasi za kiraia za ndani. Masuala yatakayojadiliwa ni pamoja na maendeleo endelevu, ushirikiano wa mabunge, na haki za binadamu.
Kamati ya Maendeleo ya Bunge la Ulaya (DEVE) inahusika na kuunda sera za maendeleo ya kimataifa na kusimamia misaada ya kibinadamu inayotolewa na EU. Kamati hiyo inahakikisha kuwa miradi ya maendeleo inayofadhiliwa na EU kote duniani inatekelezwa kwa kuzingatia malengo ya maendeleo endelevu na ushirikiano wa kimataifa.
Mkakati wa Global Gateway wa Umoja wa Ulaya unalenga kukuza maendeleo katika sekta za nishati, usafiri, afya, elimu, na utafiti kwa njia endelevu. Mpango huu unatekelezwa kwa ushirikiano wa taasisi za Umoja wa Ulaya na Nchi Wanachama wake, ukiwa na lengo la kuimarisha uchumi na miundombinu duniani kote, ikiwemo Tanzania.