Wakazi wa Wilaya ya Ulanga, mkoani Morogoro, wako mbele ya mapinduzi makubwa ya kiuchumi kufuatia uthibitisho wa kuanza kwa miradi mikubwa ya uchimbaji wa madini ya kinywe (graphite) katika eneo la Mahenge. Miradi hii inatarajiwa kufungua milango ya fursa lukuki za kiuchumi, kuanzia ngazi ya kijiji hadi kukuza pato la taifa, kutokana na uwekezaji mzito unaofanywa na kampuni mbili za Faru Graphite na Duma Graphite, zote zikifanya kazi chini ya mwavuli mmoja wa TanzGraphite.
Hayo yalibainishwa mnamo Novemba 11, 2025, na Kaimu Mkurugenzi wa Halmashauri ya Wilaya ya Ulanga, Ndugu Juma Kapilima, alipokuwa akifafanua kuhusu matarajio ya kiuchumi na kijamii yatakayotokana na uwekezaji huu mkubwa.
Ndugu Kapilima alieleza kwa kina jinsi ambavyo mradi mmoja tu, ule wa Faru Graphite, unavyotazamiwa kuwa mkombozi wa ajira katika eneo hilo. Alisema mradi huo pekee unatarajia kuzalisha ajira zipatazo 900 za moja kwa moja, yaani wafanyakazi watakaoajiriwa na kampuni. Zaidi ya hapo, kutakuwa na mzunguko mkubwa wa kiuchumi utakaotengeneza takriban ajira 4,000 zisizo za moja kwa moja. Ajira hizi ni pamoja na fursa kwa watoa huduma, wasambazaji wa vyakula, wamiliki wa nyumba za kulala wageni, na biashara nyingine ndogo ndogo zitakazoinuka kuhudumia mradi na wafanyakazi wake.
Mbali na fursa za ajira, uwekezaji huu utaenda sambamba na uboreshaji mkubwa wa miundombinu muhimu. Kaimu Mkurugenzi huyo alithibitisha kuwa kuna mpango kabambe wa kuvuta umeme mkubwa wa gridi ya taifa, wenye nguvu ya kilovoti 220 (220kV), kutoka Ifakara hadi kufika Mahenge. Hili ni jambo la kimapinduzi kwa wilaya ya Ulanga, kwani uwepo wa nishati hiyo ya uhakika utafungua fursa za viwanda vingine vidogo na kuboresha maisha ya wananchi kwa ujumla.
Vilevile, alieleza kuwa miundombinu ya barabara itajengwa na kuboreshwa kwa kiwango kikubwa, ikiwa ni pamoja na zile zitakazounganisha eneo la mradi na vitongoji pamoja na vijiji vinavyozunguka. Hii itasaidia kurahisisha shughuli za usafirishaji wa bidhaa na huduma mbalimbali.
Wawekezaji hao tayari wameanza kuonyesha nia njema ya kuishi na jamii hata kabla ya kuanza kwa shughuli kamili za uchimbaji. Akizungumzia hili, Afisa Uhusiano wa Faru Graphite, Bi. Jacqueline Mushi, alisema utekelezaji wa Mpango wa Wajibu wa Kampuni kwa Jamii (CSR) tayari umeanza. Alifafanua kuwa hadi sasa, mradi umejenga Ofisi za Serikali za Vijiji vitatu: Mdindo, Kisewe, na kuchangia mifuko 100 ya simenti kwa ajili ya ujenzi wa Ofisi ya Makanga.
Zaidi ya hayo, Bi. Mushi alieleza kuwa mradi umefanya ukarabati wa kina katika Shule ya Msingi Makanga na kuchimba visima vya maji safi na salama katika kijiji cha Mdindo, kama sehehmu ya kutatua changamoto za kijamii.
Bi. Mushi alisisitiza kuwa mradi wa Faru unalenga kuiweka Tanzania kwenye ramani ya kimataifa ya "uchumi wa kijani." Alieleza kuwa madini ya kinywe ni malighafi muhimu sana katika teknolojia za kisasa, hasa utengenezaji wa betri za magari ya umeme na vifaa vingine vya teknolojia safi. Kwa kupitia mradi huu, Tanzania inapata nafasi ya kipekee ya kuingia kwenye mnyororo wa thamani wa kimataifa.
Kauli hizi ziliungwa mkono na kiongozi wa eneo hilo, Afisa Mtendaji wa Kijiji cha Mdindo, Ndugu Nestory Uhadi. Alithibitisha kuwa mradi wa Faru Graphite umeleta matumaini makubwa kwa jamii. Alitoa ushahidi kuwa tayari zaidi ya wananchi 1,200 waliopisha utekelezaji wa mradi wameshalipwa fidia zao stahiki. Aidha, alithibitisha kuwa kupitia mradi huo, madarasa saba ya Shule ya Msingi Makanga yamefanyiwa ukarabati na ofisi mbili za kijiji zimejengwa.
Ndugu Uhadi alihitimisha kwa kusema kuwa ushirikiano mzuri uliopo sasa baina ya serikali ya kijiji na kampuni hizi za uwekezaji unaleta matumaini makubwa ya maendeleo ya haraka kwa wananchi wote wa Mahenge.