Katika jitihada za kuhakikisha nishati ya umeme inawafikia wananchi wengi zaidi vijijini, Wajumbe wa Bodi ya Nishati Vijijini (REB) wamefanya ziara ya kikazi mkoani Kilimanjaro na kutoa maagizo maalum kwa wakandarasi wanaotekeleza miradi ya umeme. Ziara hiyo ililenga hasa wilaya za Mwanga, Same, na Hai, ambapo wajumbe walitaka kuona kasi zaidi katika ukamilishaji wa miradi ya usambazaji wa nishati hiyo muhimu.
Wito mahususi ulitolewa kwa kampuni za ukandarasi zikiwemo Northern Engineering Works Ltd, RADI Service Ltd, Transpower Limited, pamoja na Octopus Engineering Ltd. Kampuni hizi zote zinaendelea na utekelezaji wa miradi ya umeme katika hatua mbalimbali, ambapo imeelezwa kuwa kiasi cha Shilingi bilioni 14 kilitengwa kwa ajili ya kugharamia miradi hiyo. Akizungumza kwa niaba ya Bodi, Balozi Radhia Msuya alisisitiza umuhimu wa wakandarasi kufanya kazi kwa bidii, weledi na kasi. "Natoa wito wa kufanya kazi kwa juhudi na weledi ili kukamilisha miradi ya kusambaza nishati ya umeme vijijini. Serikali inatumia fedha nyingi, na ingawa wakandarasi wengi katika mkoa wa Kilimanjaro wanafanya kazi vizuri, ni muhimu tuongeze kasi na tusitumie kisingizio chochote, hata kama ni changamoto ya hali ya hewa. Ni muhimu kuzingatia ukomo wa muda (Deadline)," alisema Balozi Msuya.
Aidha, kwa upande wa miradi ya kusambaza umeme kwenye vitongoji, REB ilitoa wito kwa mkandarasi, Kampuni ya Ceylex Engineering (Pvt) Ltd, kuendelea na kasi ileile ya kusambaza umeme licha ya changamoto za hali ya hewa ya mvua na ugumu wa kijiografia wa baadhi ya maeneo. Mkoa wa Kilimanjaro una jumla ya vitongoji 2,260. Kati ya hivyo, vitongoji 1,974, sawa na asilimia 87.34%, tayari vimefikiwa na huduma ya umeme kupitia miradi mbalimbali ya Wakala wa Nishati Vijijini (REA) iliyokamilika na inayoendelea. Hii ina maana kuwa ni vitongoji 286 pekee ndivyo vilivyosalia bila huduma hiyo.
Katika mradi unaoendelea wa kupeleka umeme katika vitongoji vyote nchini, unaojulikana kama Awamu ya Pili A; Fungu la 08, jumla ya vitongoji 135 katika mkoa wa Kilimanjaro vinatarajiwa kupata umeme. Mhandisi wa Miradi ya REA mkoani Kilimanjaro, Mhandisi Kelvin Melchiad, alitoa taarifa kwa Wajumbe wa Bodi akieleza kuwa mradi huu wa (HEP 2) unalenga kusambaza umeme kwenye vitongoji ambavyo havijafikiwa kabisa. "Mradi huu unalenga vitongoji 15 kwa kila jimbo katika majimbo yote 9 ya Mkoa wa Kilimanjaro, kazi inayotekelezwa na Mkandarasi Ceylex Engineering (Pvt) Ltd kwa gharama ya Shilingi bilioni 18. Mradi huu unafadhiliwa na Serikali ya Tanzania kwa asilimia 100," alieleza Mhandisi Melchiad. Aliongeza kuwa mradi unatarajiwa kukamilika ndani ya siku 730 tangu ulipoanza tarehe 03 Septemba, 2024, na unatarajiwa kukamilika tarehe 03 Septemba, 2026. Kupitia mradi huu, kutajengwa miundombinu ya msongo mdogo wa umeme (LV Line) yenye urefu wa kilomita 270, kufungwa transfoma 135 zenye ukubwa wa kVA 100 kila moja, na kuunganisha jumla ya wateja wapya 4,455 katika mkoa mzima.
Katika hatua nyingine muhimu, Wajumbe wa Bodi ya Nishati Vijijini walitoa wito kwa Shirika la Umeme Tanzania (TANESCO) mkoani Kilimanjaro kuangalia uwezekano wa kuongeza wigo wa vitambulisho vinavyokubalika kwa ajili ya usajili wa wateja wapya. Badala ya kutegemea Kitambulisho cha Taifa (NIDA) pekee, Bodi ilipendekeza kuruhusu matumizi ya vitambulisho vingine kama Kitambulisho cha Mpiga Kura. Hii ni kutokana na ukweli kwamba wananchi wengi vijijini hawana vitambulisho vya NIDA, hali inayowakosesha sifa ya kuunganishiwa huduma hiyo muhimu.
Wakati wa ziara yao, Wajumbe wa Bodi walipata pia fursa ya kutembelea Gereza la Wilaya ya Mwanga. Huko, walijionea jinsi Jeshi la Magereza linavyotekeleza kwa vitendo matumizi ya nishati safi kwa ajili ya kupikia chakula cha wafungwa wapatao 74. Wajumbe walipata fursa ya kula chakula cha mchana kilichoandaliwa kwa kutumia teknolojia hiyo ya nishati safi, ikiwa ni mfano wa kuigwa katika matumizi bora ya nishati.