Serikali ya Tanzania, chini ya uongozi wa Rais Samia Suluhu Hassan, imetenga kiasi cha shilingi bilioni 15 kwa ajili ya kuimarisha mradi wa kuzalisha umeme wa Mwenga Hydro Ltd, uliopo Wilaya ya Mufindi, mkoani Iringa. Taarifa hii imetolewa na wajumbe wa Bodi ya Nishati Vijijini (REB) wakati wa ziara yao ya kukagua mradi huo, unaotumia nguvu za maji na upepo kuzalisha umeme.
Akizungumza kwa niaba ya Mwenyekiti wa REB, Mjumbe wa Bodi, James Mabula, alieleza kuwa fedha hizo zimetolewa kupitia Wakala wa Nishati Vijijini (REA) na zitasaidia kuongeza uzalishaji wa umeme kutoka kwenye mtambo huo. Alisema mtambo huo kwa sasa unazalisha megawati 4 za umeme, na fedha hizo zitawezesha kuongeza uzalishaji na kuwafikia wananchi wengi zaidi. Hadi sasa, mradi wa Mwenga unahudumia wateja 8,000, ambao wote wamewekewa miundombinu ya umeme kwa msaada wa REA.
Meneja wa Teknolojia za Nishati, Mhandisi Michael Kessy, alisisitiza kuwa REA itaendelea kutoa ruzuku kwa miradi kama huu ili kuhakikisha kunakuwa na umeme wa kutosha. Hii itawawezesha wananchi, hasa katika maeneo ya pembezoni, kufanya shughuli zao za kiuchumi kwa ufanisi na hivyo kuboresha maisha yao.
Mtendaji Mkuu wa Mwenga Hydro Ltd, Deogratius Massawe, alishukuru sana REA kwa msaada wao wa kifedha ambao umepelekea mradi huo kufikia mafanikio makubwa. Alisema kwa sasa wameanza utaratibu wa kuunganisha wateja wapya 2,900 kupitia ruzuku ya nyongeza kutoka REA. Ziara ya Bodi ya Nishati Vijijini mkoani Iringa ilikuwa na lengo la kukagua miradi mingine ya REA na kutafuta ufumbuzi wa changamoto zinazowakabili waendelezaji wadogo wa miradi ya umeme.