Rais Samia Suluhu Hassan amezindua sera mpya ya ardhi iliyofanyiwa maboresho kutoka sera ya mwaka 1995, akieleza kuwa itasaidia kuleta mapinduzi katika sekta ya ardhi nchini Tanzania. Alisema kuwa sera hii itasaidia kufanikisha mambo sita muhimu, ikiwa ni pamoja na kutambua na kuendeleza fursa za uchumi wa buluu, ambao unazidi kuwa muhimu katika maendeleo ya taifa.
Akizungumza jijini Dodoma wakati wa uzinduzi wa Sera ya Taifa ya Ardhi ya Mwaka 1995, toleo la mwaka 2023, Rais Samia alieleza kuwa sera mpya itashughulikia maeneo ambayo hayakuzingatiwa katika sera ya awali na kuweka misingi madhubuti ya kisera. Alisema kuwa wakati wa utekelezaji wa sera ya awali, shughuli muhimu kama vile kuimarisha mipaka ya kimataifa ya Tanzania na nchi jirani zilifanyika bila kuwepo kwa msingi wa sera rasmi. Hali hii ilihitaji maboresho ili kutoa mwongozo wa wazi wa kisheria kuhusu mipaka ya nchi.
Katika kuboresha uchumi wa buluu, sera mpya imetambua umuhimu wa kusimamia rasilimali za maji kwa kupima na kumilikisha ardhi ndani ya maji. "Tunakwenda sasa kupima rasilimali zetu katika maji. Kuna diplomasia ya kutosha ambayo itahitajika ili kuelewana na majirani zetu kuhusu mipaka ya maji, na hivyo kuepusha migogoro ya ardhi kwa vizazi vijavyo," alisema Rais Samia. Aliongeza kuwa wawekezaji wa sekta ya nyumba wamekuwa wakikabiliwa na changamoto za sera ya awali, ambayo haikuruhusu uwekezaji wa nje kwenye milki ya ardhi. Alifafanua kuwa sera mpya itaweka utaratibu wa wakodishaji wa ardhi ili kuvutia uwekezaji kwenye sekta ya ujenzi, ikiwemo ujenzi wa makazi ya gharama nafuu. "Tunataka wawekezaji waje wajenge makazi bora. Sera mpya inaruhusu hilo kwa kuhakikisha ardhi inaweza kukodishwa kwa muda maalum kwa wawekezaji wa ndani na nje," alisema.
Rais Samia alibainisha kuwa asilimia 75 ya ardhi nchini bado haijasajiliwa, hali inayosababisha upotevu wa mapato na ukosefu wa usawa katika umiliki wa ardhi. "Hii si haki. Tunataka kila kipande cha ardhi nchini kipangwe, kipimwe na kisajiliwe, na kila mmoja aweze kulipia umiliki wa ardhi yake kwa haki sawa," alisema. Serikali imejipanga kurahisisha upangaji, upimaji na usajili wa ardhi ili kuhakikisha wananchi wanamiliki ardhi kwa njia rasmi, na hivyo kupunguza migogoro ya ardhi na kuimarisha usalama wa umiliki.
Katika kukabiliana na changamoto za migogoro ya ardhi, Rais Samia alisema serikali itaendelea kuimarisha mabaraza ya ardhi katika ngazi ya kijiji, kata na wilaya. Pia, alisema sera mpya itaongeza matumizi ya teknolojia ya habari na mawasiliano (TEHAMA) ili kudhibiti mifumo ya ardhi na kuzuia udanganyifu. Mfumo huu utahakikisha kuwa mafaili ya ardhi hayawezi kubadilishwa kiholela, hivyo kuzuia matapeli wanaojihusisha na ubadilishaji wa hati za umiliki wa ardhi. "Kwa kutumia TEHAMA, mifumo yetu itasomana, na wale wanaojaribu kutafuta mafaili na kubadili hati za watu watashindwa kufanya hivyo," alisisitiza.
Serikali pia imebaini kasoro katika utaratibu wa uthamini na ulipaji wa fidia ya ardhi, hali ambayo imekuwa ikizua malalamiko kutoka kwa wananchi. Rais Samia aliahidi kuwa sera mpya itaweka mfumo wa haki zaidi wa ulipaji wa fidia kwa wanaopisha miradi ya maendeleo. "Serikali imepanga kuhakikisha kuwa tathmini ya mali na ardhi inafanyika kwa haki, na kila anayestahili fidia anapewa malipo stahiki," alisema.
Katika hatua nyingine, Rais Samia alisema sera mpya inalenga kuongeza uwekezaji katika sekta ya ardhi, hasa katika miradi ya uendelezaji wa makazi bora. Serikali itahakikisha kuwa ardhi inapangwa na kutolewa kwa wawekezaji wanaotaka kuendeleza miradi ya ujenzi wa nyumba za kisasa na za gharama nafuu. Mbali na hayo, sera mpya itawezesha utunzaji bora wa taarifa za ardhi, kuziba mianya ya upotevu wa mapato, na kuongeza uwazi katika sekta ya ardhi nchini. Kwa maboresho haya, serikali inatarajia kuongeza ufanisi katika usimamizi wa ardhi, kupunguza migogoro ya ardhi, na kuvutia uwekezaji mkubwa katika sekta ya ardhi kwa maendeleo endelevu ya nchi.