Makamu Mwenyekiti wa Chama Cha Mapinduzi (CCM) Tanzania Bara, Stephen Wassira, ameitoa wito kwa serikali kuweka mkazo zaidi katika kuwawezesha wawekezaji wa ndani, akisema ndiyo njia pekee ya uhakika ya kukuza uchumi na kupunguza umaskini nchini. Alishauri kuwa nguvu kubwa ielekezwe katika kuongeza thamani kwenye sekta ya kilimo kupitia viwanda vidogo.
Wassira alitoa ushauri huo leo alipotembelea Maonesho ya 49 ya Biashara ya Kimataifa (Sabasaba) jijini Dar es Salaam. Alisema wakati Mamlaka ya Uwekezaji na Maeneo Maalum ya Kiuchumi (TISEZA) inafanya kazi nzuri ya kuvutia wawekezaji wa kigeni, ni muhimu sasa kuanzisha utaratibu maalum wa kuwatia moyo na kuwapa motisha Watanzania wenyewe wenye uwezo wa kuwekeza.
Alisema sekta ya kilimo, ambayo imeajiri asilimia 65 ya Watanzania, inahitaji uwekezaji wa haraka katika eneo la kuongeza thamani. "Wizara ya Kilimo inafanya kazi kubwa kuongeza uzalishaji, inatoa mbolea za ruzuku na kadhalika. Lakini hiyo haitoshi. Kama hatutapata wawekezaji wa ndani wa kusindika na kuongeza thamani ya mazao, wakulima wetu hawatapata soko la uhakika," alisema Wassira.
Alitolea mfano wa sekta ya nguo, akisema Tanzania haihitaji kuanza na viwanda vikubwa. Alipendekeza kuiga mfumo wa India ambapo kuna viwanda vidogo vingi vinavyotegemeana; kimoja kinatengeneza nyuzi, kingine kinatengeneza kitambaa, na kingine kinashona nguo.
"Kwa mtindo huu, tutatengeneza mnyororo kamili wa thamani. Mkulima wa pamba atakuwa na soko la uhakika la pamba yake, kutakuwa na ajira kwenye viwanda hivyo vidogo, na tutapunguza umaskini kwa kasi. Hii ndiyo njia ya kutoka hapa tulipo na kwenda mbele," alisisitiza Wassira.
Ushauri wake unalenga kuifanya TISEZA na serikali kwa ujumla kuwa karibu zaidi na wawekezaji wadogo na wa kati wa Kitanzania, ambao wana uwezo wa kuleta mapinduzi ya kiuchumi kutoka ngazi ya chini.