Hali ya vuta nikuvute ya kibiashara inaonekana kufukuta ndani ya Jumuiya ya Afrika Mashariki (EAC), na kulazimu Mawaziri wa Fedha na Uchumi wa nchi wanachama kukutana kwa kikao cha dharura leo, Julai 25, 2025, jijini Arusha. Ajenda kuu mezani ni kujadili na kutafuta suluhu ya hatua za kikodi zilizochukuliwa na baadhi ya nchi wanachama ambazo zinatajwa kubagua na kuathiri biashara ya bidhaa zinazozalishwa ndani ya Jumuiya.
Ujumbe mzito kutoka Tanzania ukiongozwa na Waziri wa Fedha, Dk. Mwigulu Nchemba, ulikutana kwa mashauriano ya ndani kujiandaa na kikao hicho muhimu. Kuonyesha uzito wa suala hili, ujumbe wa Tanzania unajumuisha pia Naibu Waziri wa Viwanda na Biashara, Exaud Kigahe, na Naibu Waziri wa Mambo ya Nje anayeshughulikia masuala ya Afrika Mashariki, Dennis Londo.
Inaelezwa kuwa baadhi ya nchi wanachama zimepitisha sheria za fedha katika bajeti zao za hivi karibuni zenye kuweka tozo ambazo zinatoa unafuu kwa bidhaa za ndani ya nchi zao, huku zikiweka mazingira magumu kwa bidhaa zinazofanana kutoka nchi nyingine za EAC, kitendo ambacho kinakinzana na misingi ya Soko la Pamoja.
Kikao hiki cha dharura ni utekelezaji wa maelekezo yaliyotolewa na Mkutano wa 46 wa Baraza la Mawaziri wa Biashara, Viwanda, Fedha na Uwekezaji (SCTIFI) ambao uliagiza suala hili la kodi kandamizi litafutiwe ufumbuzi wa haraka.
Mkutano huu wa Arusha unatajwa kuwa mtihani muhimu kwa mustakabali wa ushirikiano wa kibiashara ndani ya Jumuiya, ambapo mawaziri hao watalazimika kufikia mwafaka utakaolinda maslahi ya wazalishaji wote wa Afrika Mashariki na kuondoa vikwazo visivyo vya kiforodha vinavyokwamisha biashara.