Katika kile kinachoonekana kama kuweka sawa safu ya ushambuliaji ili kuhakikisha sekta ya nishati inatoa mchango stahiki kwa uchumi wa taifa, Waziri wa Nishati, Mhe. Deogratius Ndejembi, amefanya ziara ya kwanza ya kikazi yenye kishindo kwa kukutana na vigogo wa taasisi nyeti za Shirika la Maendeleo ya Petroli Tanzania (TPDC) na Mamlaka ya Udhibiti wa Mkondo wa Juu wa Petroli (PURA).
Kikao hicho kilichofanyika jijini Dar es Salaam, Novemba 24, 2025, kimekuja na maagizo mazito yanayolenga kuondoa urasimu na kuongeza kasi ya utekelezaji wa miradi ya kimkakati, ukiwemo mradi mkubwa wa kuchakata gesi asilia (LNG) na usambazaji wa nishati safi, ambayo ni kilio na matarajio ya mamilioni ya Watanzania.
"Hakuna Kulala, Kazi Iendelee" Akizungumza kwa utulivu lakini kwa mkazo, Waziri Ndejembi aliweka wazi kuwa Serikali ya Awamu ya Sita haitavumilia kusuasua kwa miradi inayotegemewa kubadili maisha ya wananchi. Aliwataka watendaji wa TPDC na PURA "kujifunga kibwebwe" na kufanya kazi kwa weledi, uwazi, na ushirikiano wa dhati.
"Namshukuru sana Mhe. Rais kwa imani kubwa aliyonipa kusimamia sekta hii nyeti. Lengo la kuwatembelea leo si kunywa chai, bali ni kuhakikisha tunaweka mikakati madhubuti. Tunahitaji spidi mpya ili kuhakikisha Watanzania wanapata nishati ya uhakika na kwa gharama nafuu," alisisitiza Mhe. Ndejembi.
Waziri huyo alienda mbali zaidi kwa kutaka viongozi hao wasiwe na kigugumizi cha kusema ukweli kuhusu changamoto zinazokwamisha miradi. "Leteni mezani changamoto zote zinazoathiri kasi ya utekelezaji ili tuzipatie ufumbuzi wa haraka. Sekta hii ya mafuta na gesi ina ushindani mkubwa duniani, hatuwezi kufanya kazi kwa mazoea," aliongeza.
Ushindani wa Kimataifa na Neema ya Gesi Msisitizo wa Waziri Ndejembi unakuja wakati ambapo Tanzania inapambana kuwa kitovu cha nishati katika ukanda wa Afrika Mashariki na Kati. Kwa kutambua hilo, amezitaka taasisi hizo kushirikiana kikamilifu na wadau wa ndani na nje kufanya tafiti za kina. Lengo ni kuhakikisha rasilimali za mafuta na gesi zinawanufaisha wananchi wa kawaida, kuanzia vijijini hadi mijini, kwa kukuza viwanda na kupunguza gharama za maisha.
Wakuu wa Taasisi Waitikia 'Wito' Wakipokea maelekezo hayo kwa unyenyekevu na utayari, wakuu wa taasisi hizo wameahidi kutomuangusha Waziri na Taifa kwa ujumla.
Mkurugenzi Mtendaji wa TPDC, Mussa Makame, alieleza kuwa shirika hilo limejipanga kuboresha mifumo yake ya utendaji ili iendane na kasi ya sasa ya dunia. "Tumeupokea wito wako Mheshimiwa Waziri. TPDC ipo tayari kushirikiana na wadau wote kuhakikisha gesi yetu inachimbwa na kuwafikia wananchi na masoko ya kimataifa kwa wakati," alisema Makame.
Kwa upande wake, Mkurugenzi Mkuu wa PURA, Mhandisi Charles Sangweni, aligusia suala nyeti la mapato na uwazi. Aliahidi kuwa mamlaka hiyo itaongeza nguvu katika kusimamia vyanzo vya mapato na kuhakikisha wananchi wanapata taarifa sahihi kuhusu kinachoendelea kwenye miradi yao. "Uwazi ni nguzo yetu. Tutahakikisha watanzania wanajua rasilimali zao zinasimamiwaje na faida inapatikana," alisisitiza Mhandisi Sangweni.
Ziara hii inatafsiriwa kama mwanzo wa zama mpya katika Wizara ya Nishati, huku matarajio yakiwa ni kuona miradi iliyo kwenye makaratasi ikitekelezwa kwa vitendo ili kuchochea ukuaji wa uchumi wa viwanda.