Makamu wa Rais wa Jamhuri ya Muungano wa Tanzania, Dk. Phillip Mpango, ameiagiza Wizara ya Mifugo na Uvuvi kuwapa kipaumbele vijana wanaojishughulisha na ufugaji wa samaki kwa kutumia vizimba, kwa lengo la kuwawezesha kupata mitaji mikubwa itakayowafanya waweze kuyafikia masoko ya kimataifa. Pia, ameitaka Wizara hiyo kuweka mkakati madhubuti wa kuwatangaza vijana hawa kupitia vyombo mbalimbali vya habari, ili wawe mfano na hamasa kwa vijana wengine kujiajiri.
Dk. Mpango alitoa maagizo haya mazito wakati akitembelea maonyesho ya wakulima, maarufu kama Nane Nane, mkoani Dodoma. Alisikiliza kwa makini ushuhuda wa vijana tisa wa kikundi kinachojulikana kama VIJANA NGUVU KAZI MWANZA, ambao walikopeshwa na Benki ya Maendeleo ya Kilimo (TADB) na kufanikiwa sana katika ufugaji wa samaki kwa kutumia vizimba. Dk. Mpango alisisitiza kuwa vijana hawa wanapaswa kutangazwa ili kuwaonyesha vijana wengi mtaani ambao wanalalamikia ukosefu wa ajira, kwamba kuna fursa nyingi za kujiajiri. “Hawa vijana nataka niwaone mara kwa mara kwenye vyombo vya habari. Watumieni hawa, watakuwa walimu wazuri kwa vijana wenzao,” alisema Dk. Mpango.
Akitoa pongezi kwa hatua zilizochukuliwa na Benki ya TADB, Dk. Mpango aliwahimiza wadau wengine wa kifedha waliohudhuria maonyesho hayo kuwasaidia vijana hao. “Hawa vijana hawana changamoto, wanachotaka ni nguvu ya kukua. Benki zingine mpo hapa, wasaidieni hawa vijana wapate mitaji mikubwa ili waweze kuchakata samaki wao na hata kuuza kwenye masoko ya kimataifa,” alisisitiza Makamu wa Rais. Aliongeza kuwa minofu ya samaki ina soko kubwa ndani na nje ya nchi, hivyo uwezeshaji huu utawasaidia vijana hao kufanya biashara kubwa na kujikwamua kiuchumi.
Katibu wa kikundi hicho, Pius Makindi, alitoa maelezo ya kina kwa Makamu wa Rais. Alieleza kuwa walikabidhiwa mradi huo mnamo Januari 2024 na Rais Samia Suluhu Hassan. Walipata mkopo wa awali wa Shilingi milioni 137.9 kutoka Benki ya TADB, ambao uliwawezesha kununua vizimba tisa. Baada ya kuvuna vizimba sita, walipata faida ya Shilingi milioni 102, na baada ya kuvuna vizimba vitatu vilivyobaki walipata Shilingi milioni 25 zaidi. Walifanikiwa kurejesha mkopo wa Shilingi milioni 68 na kubaki na Shilingi milioni 34. Baada ya kulipa mkopo huo, walikopeshwa tena Shilingi milioni 63 na Benki ya TADB na kufanikiwa kupata faida kubwa ya Shilingi milioni 106.
Makindi alimalizia kwa kutoa ombi kwa Serikali na taasisi za fedha kuwasaidia kupata mtaji zaidi. “Tunatamani sasa tutoke hapa tulipo ili tuchakate samaki na kuuza nje ya nchi. Tunaomba taasisi za fedha na mashirika watutembelee tuwaeleze mipango yetu ili watukopeshe mtaji mkubwa zaidi, tuwe na vizimba 30 au 50. Tukifanya hivyo, faida itakuwa kubwa sana na sisi tutakuwa kiuchumi kwa muda mfupi," alimaliza Makindi, akieleza malengo yao makuu.