Mkurugenzi Mtendaji wa Mfuko wa Maendeleo ya Jamii (TASAF), Shadrack Mziray, amesisitiza kuwa uzinduzi wa Dira ya Taifa ya Maendeleo 2050 si tukio lenye itikadi za kisiasa, bali ni hatua muhimu ya kimkakati inayoashiria dhamira ya pamoja ya Tanzania kuelekea uchumi jumuishi na ustawi kwa kila raia. Akizungumza jijini Dodoma mara baada ya Rais Samia Suluhu Hassan kuzindua rasmi dira hiyo jana, Mziray alifafanua kuwa mpango huu wa muda mrefu unakuja wakati ambapo Tanzania imefikia daraja la chini la uchumi wa kati, na unalenga kufikia daraja la juu ifikapo mwaka 2050 kwa kuhakikisha hakuna Mtanzania anayebaki nyuma kimaendeleo.
"Uchumi tunaouelekea ni uchumi jumuishi ambapo wananchi wote wananufaika. Maendeleo ya kiuchumi hayawezi kuwa na maana bila ustawi wa jamii," alisema Mziray, akiongeza kuwa shughuli za TASAF zinaendana moja kwa moja na malengo makuu ya dira hii mpya. TASAF imejitokeza kama shirika mstari wa mbele katika kusaidia jamii zilizopo katika mazingira magumu kupitia miradi mbalimbali ya hifadhi ya jamii. Hii inajumuisha utoaji wa ruzuku za fedha kwa kaya maskini, kuwezesha upatikanaji wa elimu bora, huduma za afya, na kuinua uchumi wa mtu mmoja mmoja, hasa katika maeneo ya vijijini na pembezoni mwa nchi yetu.
Mziray alieleza kuwa dira hiyo imeweka mkazo mkubwa katika umuhimu wa kuwaunganisha watu wa kipato cha chini na fursa rasmi za maendeleo, huku ikihakikisha kuwa afua za kijamii zinawafikia walengwa kwa usahihi na ufanisi. "Takwimu zinaonesha kuwa asilimia 26 ya Watanzania bado wanaishi kwenye umaskini wa hali ya chini. Ni muhimu kuhakikisha watu hawa wanakuwa sehemu ya mchakato wa maendeleo, mfano kupitia mpango wa bima ya afya kwa wote, tunawawezesha wananchi kupata huduma bora bila mzigo wa gharama," alifafanua Mziray, akionyesha jinsi mipango kama hiyo inavyotekelezwa.
Aidha, aliongeza kuwa katika sekta ya elimu, TASAF imewezesha watoto kutoka kaya maskini kwenda shule, kupata vifaa vya kujifunzia, sare za shule, na mazingira bora ya elimu, hivyo kuwawezesha kuwa na fursa sawa na watoto wengine. Mziray alisisitiza kuwa mchango wa TASAF ni muhimu sana katika kufanikisha maendeleo jumuishi na akatoa wito kwa wananchi wote kuisoma, kuielewa, na kuitafsiri dira hiyo kwa vitendo katika maisha yao ya kila siku. "Tusiwe watazamaji. Tutikise jamii zetu, tushiriki kikamilifu katika utekelezaji wa dira hii. Hii si ndoto ya Serikali pekee, ni ndoto ya Watanzania wote. Tuifanye kuwa halisi," alihimiza Mziray.
Kwa upande wake, Japhet Boaz, Mkurugenzi wa Mifumo, Tafiti na Mawasiliano wa TASAF, alieleza kuwa kuzinduliwa kwa dira hiyo ni ishara wazi kuwa Serikali ya Awamu ya Sita imejipanga kikamilifu kuelekea miaka 25 ya kupanga maendeleo jumuishi kwa makundi yote ya wananchi. Boaz alithibitisha kuwa taasisi yao imejipanga kushiriki kikamilifu katika kusaidia kaya maskini, wazee, na jamii zilizoathiriwa na majanga, akisisitiza kuwa dira hiyo inaweka msingi thabiti wa kujenga taifa lenye usawa na mshikamano, na kuhakikisha hakuna anayebaki nyuma katika safari ya maendeleo. "Kwa kasi ya sasa na malengo yaliyowekwa, ninaamini mwaka 2050 Tanzania itakuwa imepiga hatua kubwa si kiuchumi tu, bali pia katika ustawi wa jamii," alimalizia Boaz.