Mkuu wa Mkoa wa Mwanza, Said Mtanda, amesema serikali itaendelea kufanya kazi kwa karibu na wadau wa maendeleo nchini ili kuhakikisha kuwa uangalizi wa watoto wenye umri kati ya miaka 0 hadi 8 unaimarishwa katika masuala ya afya, lishe, ulinzi, na ujifunzaji wa awali.
Mtanda alitoa kauli hiyo jijini Mwanza leo, wakati akifungua mkutano wa nusu mwaka wa tathmini ya utekelezaji wa programu jumuishi ya malezi, makuzi, na maendeleo ya awali ya mtoto (MMMAM), kuelekea kilele cha maadhimisho ya Siku ya Kimataifa ya Familia, iliyopewa jina la ‘Tanzania Malezi Summit’ na kauli mbiu isemayo ‘Mtoto ni Malezi’.
Alisema kuwa takwimu za Sensa ya Watu na Makazi ya mwaka 2022 zinaonyesha kuwa zaidi ya robo ya Watanzania ni watoto wenye umri kati ya miaka 0 hadi 8, na akasisitiza kuwa kuna haja ya kuwekeza kwa kundi hili muhimu mapema ili kuhakikisha maendeleo ya kijamii na kiuchumi kwa vizazi vijavyo.
"Asilimia 47 ya watoto wenye umri wa miezi 24 hadi 59 wanaonyesha dalili za ukuaji timilifu wa kiafya na kihisia, jambo linaloonyesha umuhimu wa kuendeleza juhudi katika sekta ya afya, lishe, ulinzi, na ujifunzaji wa awali," alisema Mtanda.
Mtanda aliongeza kuwa taifa haliwezi kuzungumzia maendeleo ya kweli ikiwa jamii haizingatii malezi bora na makuzi yenye tija kwa watoto, ambao ndio msingi wa taifa la kesho.
Mkurugenzi wa Maendeleo ya Mtoto kutoka Wizara ya Maendeleo ya Jamii, Sebastian Kitiku, alieleza kuwa uwekezaji mkubwa kwa watoto wenye umri kati ya miaka 0 hadi 8 una matokeo makubwa sana.
"Unatakiwa kufanya mambo machache kwa kuwekeza vya kutosha na kumfanya mtoto kuwa na uelewa mkubwa darasani, uwezo mkubwa wa kupambanua mambo na kuchagua mambo katika umri wake mdogo na ataendelea mpaka Maisha yake yote na hili litatusaidia kuwa na Taifa lenye vizazi bora," alisema Kitiku.
Kitiku alisisitiza kuwa malezi bora katika umri mdogo wa mtoto ni uwekezaji muhimu ambao utalipa kwa faida kubwa katika maisha yake yote, na kuleta taifa lenye raia wenye uwezo mkubwa wa kufikiri na kuchangia maendeleo.