Wito umetolewa kwa Serikali ya Finland na Shirika la Umoja wa Mataifa la Afya ya Uzazi (UNFPA) kuendelea kufadhili awamu nyingine ya mradi wenye mafanikio wa 'Chaguo langu, Haki yangu' ili kuweza kuwafikia wananchi wengi zaidi nchini Tanzania na kuhakikisha jamii inakuwa salama na yenye ustawi.
Hayo yameelezwa jijini Dar es Salaam na Katibu Mkuu wa Wizara ya Maendeleo ya Jamii, Jinsia, Wazee na Watoto Zanzibar, Bi Abeida Rashid Abdallah, katika mkutano wa tathmini ya utekelezaji wa mradi huo ambao umetekelezwa kwa kipindi cha miaka mitatu na nusu kwa mafanikio makubwa.
Bi Abdallah amesema kuwa licha ya mafanikio yaliyopatikana, bado kuna idadi kubwa ya wanawake na wasichana, hasa wale walio nje ya maeneo ambayo mradi umefikia, ambao wanaendelea kukumbana na changamoto mbalimbali kama vile ukatili wa kijinsia, mila kandamizi, na ukosefu wa huduma muhimu za kijamii na afya ya uzazi.
"Mradi huu umekuwa msaada mkubwa katika utekelezaji wa sera na mikakati mbalimbali ya kitaifa, ikiwemo mpango kazi wa kupambana na udhalilishaji wa wanawake na watoto (NPA-VAWC II 2025-2030), mpango wa maendeleo ya Zanzibar (ZADEP 2020-2025) pamoja na Dira ya Maendeleo ya Zanzibar ya mwaka 2050. Bado tunawahitaji sana," amesisitiza Bi Abdallah.
Ameipongeza serikali ya Finland kwa ushirikiano wake na UNFPA katika kufadhili na kutekeleza mradi huu muhimu ambao unalenga kulinda haki na chaguzi za wanawake na wasichana, hasa wale wenye ulemavu, kote nchini.
Mwakilishi mkazi wa UNFPA nchini Tanzania, Bwana Mark Schreiner, ameishukuru serikali ya Finland kwa mchango wao, akisema kuwa mradi huo umekuwa muhimu sana katika kufikia mustakabali ambapo wanawake na wasichana wote wanaweza kuishi kwa amani, uhuru, na usawa.
Ameongeza kuwa mradi huo unaunga mkono juhudi za kitaifa za kupambana na ukatili wa kijinsia (GBV), ndoa za utotoni, na ukeketaji kupitia mbinu shirikishi zinazohusisha sekta mbalimbali.
Naibu Mkuu wa Ushirikiano kutoka Ubalozi wa Finland nchini Tanzania, Bi Sanna Taivalmaa, amesema kuwa dhamira ya nchi yake ni kuona usawa wa kijinsia kama sehemu muhimu ya sera zao za kigeni.
Bi Taivalmaa amesema kuwa Finland imejitolea kuendeleza afya ya uzazi na kukomesha ukatili wa kijinsia, huku ikihakikisha ushirikishwaji kamili wa wanawake na wasichana wenye ulemavu katika masuala yote.
Ameupongeza mradi wa 'Chaguo langu, Haki yangu' kwa kuwezesha wasichana na wanawake kupinga kanuni hatari za kijamii na kuimarisha upatikanaji wa huduma kwa kushirikiana kwa karibu na mamlaka za mitaa na mashirika yanayosaidia watu wenye ulemavu.
Mratibu wa mradi huo, Bi Rashida Sharrif, amefahamisha kuwa mradi huo umegharimu jumla ya Dola za Kimarekani milioni 6.9 (takriban Shilingi za Kitanzania Bilioni 17.25 kwa hesabu ya sasa). Hapo awali, walipokea Dola milioni 6.2, na baadaye kiasi cha Dola milioni 1.7 kiliongezwa kwa ajili ya kuongeza wigo wa mradi.