Wakazi wa Kijiji cha Nyasamba, kilichopo Wilaya ya Kishapu, hatimaye wamevuta pumzi ya afueni baada ya huduma muhimu ya maji safi na salama kurejeshwa kufuatia juhudi za haraka za Wakala wa Majisafi na Usafi wa Mazingira Vijijini (RUWASA). Hali hiyo imerejea baada ya zaidi ya siku mbili za adha iliyosababishwa na kuharibika kwa pampu ya kisima kirefu kinachotegemewa na jamii hiyo.
Katika kipindi chote cha ukosefu wa huduma, maisha ya kila siku ya wananchi yalikuwa yamevurugika, wengi wakilazimika kutembea umbali mrefu kutafuta maji na wengine wakitumia maji ya mabwawa yasiyo salama, na hivyo kujiweka katika hatari ya magonjwa ya mlipuko. Mmoja wa wakazi, Bi. Leah Samweli, alieleza changamoto hiyo akisema, "Tulipata shida sana, hasa sisi wanawake. Kutumia maji ya bwawa ni hatari, lakini hatukuwa na jinsi. Tunaishukuru RUWASA kwa kutusikiliza na kutatua hili haraka."
Pamoja na shukrani hizo, Bi. Samweli alitoa ombi zito kwa serikali, akieleza kuwa suluhu ya kudumu inahitajika. "Tunaomba sana serikali itufikirie na kutuletea Mradi wa Maji kutoka Ziwa Victoria. Hilo ndilo litakaloondoa kabisa hii adha ya pampu kuharibika kila mara," aliongeza.
Kauli yake iliungwa mkono na Mwenyekiti wa Kijiji, Bw. Martin Kafumu, ambaye alisisitiza kuwa kijiji chake chenye takribani kaya 800 kilikuwa kwenye hatihati ya kukumbwa na magonjwa kama kipindupindu.
Akithibitisha kurejea kwa huduma, Meneja wa RUWASA Wilaya ya Kishapu, Mhandisi Dickson Kamazima, alifafanua kuwa chanzo cha tatizo kilikuwa ni hitilafu kwenye pampu kuu inayohudumia matangi ya Bubiki na Nyasamba. "Timu yetu ya wataalamu ilifanya kazi usiku na mchana, na tumefanikiwa kufunga pampu mpya kabisa. Kwa sasa huduma imerejea kikamilifu na maji yanapatikana kama kawaida," alihakikishia Mhandisi Kamazima.