Mbunge wa Jimbo la Kishapu, Boniphace Butondo, ameonyesha kujitolea kwake katika kuinua kiwango cha elimu kwa kutoa vifaa vya Teknolojia ya Habari na Mawasiliano (TEHAMA) kwa wanafunzi wa shule ya sekondari ya Kishapu. Hatua hii inalenga kuunga mkono juhudi kubwa zinazofanywa na Rais Samia Suluhu Hassan katika kuboresha sekta ya elimu nchini, ili kuhakikisha kuwa wanafunzi wanapata fursa ya kusoma vizuri na kufikia ufaulu bora katika masomo yao.
Vifaa hivyo vilikabidhiwa rasmi jana, Machi 22, 2025, katika shule hiyo iliyopo Kishapu. Akizungumza wakati wa makabidhiano hayo, Mbunge Butondo alisisitiza kuwa yeye ni mtu wa kutekeleza ahadi zake. Alikumbusha kuwa aliwaahidi wanafunzi hao kuwapelekea vifaa vya TEHAMA pamoja na televisheni, ambayo ingewasaidia kufuatilia taarifa za habari, hasa katika siku za mapumziko za mwisho wa wiki.
"Leo nimetekeleza ahadi yangu kwenu na kuwaletea vifaa hivi vya TEHAMA, televisheni ambayo mliniomba kwa ajili ya kuangalia taarifa ya habari," alisema Mbunge Butondo kwa furaha. Aliongeza kuwa vifaa hivyo vita kuwa msaada mkubwa si tu kwa wanafunzi, bali pia kwa walimu katika maandalizi ya masomo yao na uchapishaji wa mitihani. "Hakuna tena ulazima wa kwenda kwenye steshenari za watu binafsi, hii itapunguza gharama za uandaaji wa mitihani," alifafanua.
Mbunge Butondo aliendelea kwa kuomba ushirikiano katika utunzaji wa vifaa hivyo, akisisitiza umuhimu wa kuvitumia kwa uangalifu ili viweze kudumu kwa muda mrefu na kuwanufaisha wanafunzi wengi zaidi. Aliwasihi wanafunzi kusoma kwa bidii na kujituma ili waweze kutimiza ndoto zao za kimasomo na kimaisha.
Diwani wa Kishapu, Joel Ndetoson, alimpongeza Mbunge Butondo kwa ukarimu wake na kwa kutekeleza ahadi alizotoa. Aliahidi kumuunga mkono kwa kuchangia gharama za kifurushi cha intaneti kila mwezi, ili wanafunzi waweze kutumia vifaa hivyo vya TEHAMA kufuatilia taarifa za habari na kuona mambo mbalimbali ya maendeleo yanayotekelezwa na Serikali chini ya uongozi wa Rais Samia Suluhu Hassan.
Mkuu wa Shule ya Sekondari Kishapu, Buhoro Mipawa, alimshukuru sana Mbunge Butondo kwa msaada huo muhimu wa vifaa vya TEHAMA. Alisema kuwa vifaa hivyo vimefika kwa wakati muafaka, ambapo dunia ya sasa inaendeshwa na sayansi na teknolojia. Aliongeza kuwa vifaa hivyo vitaongeza sana ubora wa elimu inayotolewa shuleni hapo.
"Shule yetu hii imekuwa ikifanya vizuri katika taaluma na tunamshukuru Mbunge kwa kutuletea vifaa hivi vya TEHAMA. Kwa mfano, katika matokeo ya mwaka 2024 ya kidato cha nne, wanafunzi waliofanya mtihani walikuwa 94, daraja la kwanza walipata wanne, la pili 19, tatu 40 na daraja la 4 walikuwa 31," alieleza Mkuu wa Shule kwa kujigamba. Aliongeza kuwa matokeo ya kidato cha sita kwa mwaka 2024 pia yalikuwa mazuri, ambapo wanafunzi 67 walifanya mtihani na 57 kati yao walipata daraja la kwanza, huku 10 wakipata daraja la pili. Hakukuwa na mwanafunzi yeyote aliyepata daraja la tatu au la nne.
Baadhi ya wanafunzi waliozungumza walimshukuru Mbunge Butondo kwa kutimiza ahadi yake na waliahidi kujitahidi zaidi katika masomo yao ili wasimuangushe yeye na wazazi wao.
Mbali na vifaa vya TEHAMA, Mbunge Butondo pia aliwapatia wanafunzi hao mchele, kwa ajili ya kuongeza chakula cha jioni na kubadilisha mlo wao. Hii ni ishara ya wazi ya kujali hali ya wanafunzi kwa ujumla.