Huku homa ya sherehe za mwisho wa mwaka ikiwa imepanda na mamilioni ya Watanzania wakiwa katika harakati za kusafiri kurejea makwao kujumuika na familia zao, Jeshi la Polisi Kikosi cha Usalama Barabarani limeamua kuvaa njuga suala la usalama ili kuhakikisha furaha ya sikukuu haigeuki kuwa vilio na simanzi.
Katika kuhakikisha hilo linatekelezwa kwa vitendo, vigogo wa usalama barabarani wamefanya ziara ya kushtukiza katika kitovu cha usafiri Nyanda za Juu Kusini, jijini Mbeya. Mkoa wa Mbeya, ambao ni lango kuu la kuingia na kutoka nchi za Kusini mwa Afrika (SADC) na mikoa ya Songwe, Rukwa na Katavi, umekuwa kituo muhimu cha kampeni hii kutokana na jiografia yake ya milima na kona kali zinazohitaji umakini wa hali ya juu.
Elimu Kabla ya Faini
Akizungumza katikati ya harakati za abiria na milio ya mabasi katika Stendi Kuu ya Mabasi jijini Mbeya, Mkuu wa Dawati la Elimu kwa Umma kutoka Makao Makuu ya Polisi, Mrakibu Mwandamizi wa Polisi (SSP) Mbunja Matibu, amesema jeshi hilo limebadili mbinu. Badala ya kuvizia madereva njiani, wameamua kuwafuata "jikoni" wanakoanzia safari ili kuwapa elimu itakayookoa maisha.
SSP Mbunja alisisitiza kuwa kipindi hiki cha mwisho wa mwaka kina vishawishi vingi kwa madereva. Tamaa ya 'kupiga raundi' nyingi ili kupata faida kubwa isiwafanye wasahau kuwa wamebeba roho za watu na siyo mizigo ya viazi.
"Tuko hapa Mbeya kutoa 'dozi' ya elimu. Tunajua huu ni msimu wa pilikapilika, lakini tunawakumbusha madereva na wamiliki wa mabasi kuzingatia sheria. Hatutaki kuona familia zinapoteza wapendwa wao kisa uzembe ambao unaweza kuzuilika. Uharaka wa kufika usisababishe safari ya mwisho ya maisha ya mtu," alionya SSP Mbunja kwa sauti ya kuelimisha.
Lengo kuu la ziara hiyo ni kuziba mianya yote ya uzembe, ikiwemo mwendo kasi, kuyapita magari mengine bila tahadhari (overtaking), na uchovu wa madereva, mambo ambayo yamekuwa yakitajwa kama vyanzo vikuu vya ajali mbaya nchini.
Mkono wa Chuma kwa Wakaidi
Kwa upande wake, "Bosi wa Trafiki" Mkoa wa Mbeya (RTO), SSP Notker Kilewa, hakuwa na maneno ya kubembeleza kwa madereva watakaokaidi maelekezo ya kisheria. Kilewa aliweka wazi kuwa kikosi chake kiko tayari kwa operesheni maalum usiku na mchana barabarani.
"Tunaendelea na operesheni kali. Elimu tunatoa, ndiyo, lakini kwa wale watakaoziba masikio na kuchezea sheria, tutawanyoosha kwa mkono wa chuma. Sheria ya usalama barabarani haina likizo. Tutachukua hatua kali kwa makundi yote ya watumiaji wa barabara, wawe ni madereva wa mabasi, malori, au bodaboda. Vifo na majeruhi barabarani lazima vikome," alisisitiza SSP Kilewa kwa ukali.
Abiria Wafunguka
Abiria waliokutwa stendi hapo wameonekana kufarijika na uwepo wa maafisa hao wa juu wa polisi. Jimalimanya Ng’itu, mmoja wa wasafiri waliokuwa wakisubiri usafiri, alipongeza hatua hiyo akisema inawapa matumaini ya kufika salama.
"Ukiona polisi wanakagua magari na kuongea na madereva kabla hatujaondoka, roho inatulia. Hii inawatia hofu madereva watukutu na kutufanya sisi abiria tujione tunalindwa. Tunawaomba wasiishie stendi tu, wawepo na barabarani kudhibiti wale wanaochochea mwendo pindi wakitoka mjini," alisema Ng'itu.
Kampeni hii ya Jeshi la Polisi inatafsiriwa kama mkakati muhimu wa kitaifa wa kupunguza ajali, huku rai ikitolewa kwa abiria pia kutokuwa chanzo cha ajali kwa kushinikiza madereva kukimbia ili wahi, bali wawe walinzi kwa kukemea mienendo hatarishi.