Mkurugenzi Mkuu wa Mamlaka ya Udhibiti wa Mkondo wa Juu wa Petroli (PURA), Mhandisi Charles Sangweni, amesisitiza uhusiano wa karibu uliopo kati ya sekta za gesi asilia na kilimo, akisema ushirikiano imara kati ya sekta hizi unaweza kuleta mapinduzi makubwa na kuimarisha uchumi wa taifa. Akizungumza wakati wa ziara yake kwenye Maonesho ya Kimataifa ya Kilimo ya Nanenane jijini Dodoma, Mhandisi Sangweni alieleza namna sekta hizi zinavyotegemeana na fursa zilizopo ambazo bado hazijatumika kikamilifu.
Mojawapo ya fursa hizo muhimu ni matumizi ya gesi asilia kama malighafi ya kuzalisha mbolea. Mhandisi Sangweni alifafanua kuwa gesi asilia inayopatikana nchini inaweza kutumika kutengeneza amonia, kemikali muhimu inayohitajika kuzalisha mbolea mbalimbali, ikiwemo urea. Hii itapunguza utegemezi wa mbolea za nje, na kuongeza tija na faida kwa wakulima wa ndani.
Pia, Mhandisi Sangweni alibainisha kuwa matumizi ya gesi asilia kwenye magari yamekuwa na manufaa makubwa kwa kupunguza gharama za uendeshaji. Alisema, kwa kutumia gesi asilia katika magari yanayosafirisha mazao ya kilimo, mifugo, na uvuvi, gharama za usafirishaji zitapungua kwa kiasi kikubwa. Hii itapunguza bei ya bidhaa kwa watumiaji wa mwisho na kuongeza faida kwa wakulima na wafanyabiashara.
Pamoja na manufaa hayo, Sangweni alikiri kwamba bado kuna changamoto zinazohitaji kushughulikiwa. Alieleza kuwa kampuni za kimataifa, hasa zile zinazohusika na miradi ya nishati, zinahitaji bidhaa za kilimo zenye viwango vya hali ya juu ambavyo watoa huduma wachache sana Watanzania wanavikidhi. Hili ni jambo ambalo PURA, kwa kushirikiana na wadau wengine, wanaendelea kulishughulikia ili kuhakikisha viwango hivi vinafikiwa kwa maslahi mapana ya nchi. Kwa kuunganisha sekta hizi mbili muhimu, Tanzania inaweza kujenga uchumi imara na endelevu, ambapo rasilimali zake za gesi asilia zinachochea ukuaji wa sekta ya kilimo, na kilimo nacho kinatoa huduma muhimu kwa sekta ya nishati.