Mawakala wanaomsimamia nyota wa Real Madrid, Vinícius Júnior, wamepeleka ombi la mshahara mnono kwa klabu hiyo ya Uhispania. Madai haya yanakuja huku mazungumzo kuhusu uwezekano wa mchezaji huyo kuendelea kubaki Bernabéu baada ya mkataba wake wa sasa kumalizika mwaka 2027 yakiendelea, kwa mujibu wa taarifa kutoka ESPN.
Inaelezwa kuwa wawakilishi wa mchezaji huyo mwenye kipaji kutoka Brazil wanatarajia kukutana tena na viongozi wa Real Madrid hivi karibuni ili kuendeleza mazungumzo kuhusu hatima yake ndani ya klabu hiyo.
Kulingana na chanzo hicho cha habari, inaonekana kuwa Vinícius yuko karibu zaidi kusaini mkataba mpya na Real Madrid kuliko kukubali ofa nono kutoka Saudi Arabia. Hii ni licha ya ripoti mbalimbali kutoka vyombo vya habari vya Hispania ambazo zimekuwa zikieleza kuhusu uwezekano wa yeye kujiunga na ligi hiyo ya Saudi Pro League ambayo inazidi kuvutia wachezaji wakubwa duniani kwa ofa zake za kifedha zenye kuvutia.
Ligi ya Saudi Arabia inaelezwa kuwa na nia kubwa ya kumfanya Vinícius Júnior kuwa mchezaji anayelipwa mshahara mkubwa zaidi duniani. Hata hivyo, taarifa za ndani zinaonyesha kuwa hakujakuwa na maendeleo yoyote ya maana katika mazungumzo hayo tangu mwezi Desemba mwaka 2024.
Ingawa chanzo cha habari hakikufichua ni kiasi gani hasa cha fedha ambacho Vinícius anataka kutoka kwa Real Madrid, inaripotiwa kuwa anataka kulipwa mshahara ambao unazidi kile wanacholipwa wachezaji wengine nyota kama Kylian Mbappé na Jude Bellingham. Hawa ni baadhi ya wachezaji wanaolipwa mishahara mikubwa zaidi barani Ulaya kwa sasa.
Mkataba wa sasa wa Vinícius Júnior na Real Madrid unatarajiwa kumalizika mwaka 2027. Kwa mujibu wa ESPN, mshahara wake wa sasa unakadiriwa kuwa takribani euro milioni 10 kwa msimu, pamoja na bonasi mbalimbali ambazo zinategemea mafanikio yake binafsi na mafanikio ya klabu kwa ujumla. Kwa hesabu ya haraka, euro milioni 10 ni sawa na takribani shilingi za Kitanzania bilioni 25 (kwa kutumia wastani wa kubadilisha fedha wa sasa).
Real Madrid ilikutana na mawakala wa Vinícius Júnior katika wiki iliyopita ili kuanza rasmi mazungumzo ya kuongeza mkataba wake. Hata hivyo, chanzo hicho kinasema kuwa mchezaji huyo haoni haraka ya kufanya uamuzi wa mwisho kuhusu mustakabali wake, licha ya kuwa amekuwa akiongea hadharani kuhusu nia yake ya kuendelea kubaki katika uwanja wa Santiago Bernabéu kwa muda mrefu zaidi.
Klabu ya Real Madrid inatarajiwa kuendelea na mazungumzo haya kwa umakini ili kuhakikisha kuwa nyota huyo muhimu anaendelea kuwa sehemu ya kikosi chao kwa miaka mingi ijayo. Mashabiki wa klabu hiyo wanasubiri kwa hamu kuona iwapo klabu itaweza kufikia makubaliano na Vinícius Júnior kuhusu mahitaji yake ya mshahara ili aweze kuendelea kuwachezea.