Klabu ya Simba SC imefanikiwa kuizima vita ya usajili iliyokuwa inawaniwa vikali na wapinzani wao wa jadi, Yanga SC na Azam FC, baada ya kukamilisha ununuzi wa nyota wawili wa JKT Tanzania, kipa Yakoub Suleiman na kiungo mshambuliaji Wilson Nangu. Wawili hao sasa ni mali halali ya Wekundu wa Msimbazi baada ya kusaini mikataba ya miaka mitatu kila mmoja.
Habari kutoka ndani ya klabu hiyo zinaeleza kuwa usajili huu ulikuwa na changamoto kubwa, kwani vigogo hao wengine wa soka la Tanzania walijaribu kuingilia kati na kupindua meza dakika za mwisho. Inadaiwa kuwa Yanga na Azam walipata fununu kwamba wachezaji hao walikuwa wamesaini mikataba ya awali tu, hali iliyowapa mwanya wa kujaribu kuwashawishi kwa dau nono zaidi.
Jaribio hilo la "usajili wa dirishani" lilikaribia kufanana na sakata maarufu la kiungo Yusuph Kagoma, ambaye iliaminika alikuwa akielekea Yanga kabla ya kutambulishwa ghafla Msimbazi. Hata hivyo, uongozi wa Simba ulikuwa macho na ulipopata taarifa hizo, ulifanya mkakati wa haraka. Mara tu wachezaji hao walipomaliza majukumu yao na timu ya taifa, Taifa Stars, Simba iliwadaka na kukamilisha taratibu zote za mikataba halali na kuwasajili kwenye Mfumo wa Uhamisho wa Wachezaji (TMS) kabla ya dirisha la usajili kufungwa.
Mbali na weledi wa viongozi, msimamo thabiti wa wachezaji wenyewe ulitajwa kama sababu kuu ya dili hilo kufanikiwa. Inasemekana kuwa Yakoub na Nangu walikuwa na shauku ya kuvaa uzi mwekundu na mweupe, hasa baada ya kuwa na mazungumzo ya moja kwa moja na kocha mkuu, Fadlu Davids. Utaratibu huu mpya wa kocha kuzungumza na mchezaji kabla ya kusajiliwa unasemekana kuwapa wachezaji ari na hisia ya kuthaminiwa.
Thamani ya wachezaji hawa ilipanda kwa kasi kufuatia viwango vyao bora walipokuwa na kikosi cha Stars kilichoshiriki fainali za CHAN, jambo lililoongeza ushindani katika kuwania saini zao. Inakadiriwa kuwa usajili wa Nangu pekee umeigharimu Simba jumla ya Dola za Marekani 220,000 (takriban Shilingi za Kitanzania milioni 580) zilizojumuisha ada ya uhamisho, malipo ya usajili na sehemu ya mshahara wake.
Wakati huohuo, kipa namba moja wa Taifa Stars, Yakoub Suleiman, tayari ametoa salamu za shukrani na kuwaaga rasmi mashabiki, viongozi na wachezaji wenzake wa JKT Tanzania kupitia kurasa zake za mitandao ya kijamii. Kwa upande wake, Meneja wa Habari na Mawasiliano wa Simba, Ahmed Ally, amedokeza kuwa mashabiki wakae mkao wa kula kwani klabu hiyo inatarajia kutangaza wachezaji wengine wapya hivi karibuni.