Katika kuhakikisha timu ya taifa, Taifa Stars, inapata nguvu ya kutosha kutoka kwa mchezaji wake wa 12, serikali imepokea hundi ya Shilingi milioni 30 kutoka Benki ya NMB. Fedha hizo zimetolewa mahsusi kwa ajili ya kununua tiketi za mashabiki na kutoa motisha kwa wachezaji kuelekea mchezo wao muhimu wa robo fainali ya michuano ya CHAN dhidi ya Morocco. Mtanange huo wa kufa au kupona unatarajiwa kupigwa siku ya Ijumaa, saa mbili usiku, katika Uwanja wa Benjamin Mkapa, Dar es Salaam.
Akipokea msaada huo jana, Msemaji Mkuu wa Serikali, Gerson Msigwa, aliishukuru NMB kwa kuwa mstari wa mbele kuunga mkono juhudi za Rais Samia Suluhu Hassan za kuinua michezo nchini. Alisema mchango huo utasaidia kuujaza uwanja na kuwapa wachezaji hamasa ya kupambana kufa na kupona ili kuipeperusha vyema bendera ya taifa.
"Tunaishukuru Benki ya NMB kwa fedha hizi. Lengo letu ni kuhakikisha timu yetu ya taifa inapata sapoti ya kutosha na kufika fainali," alisema Msigwa, huku akitoa wito kwa kampuni na taasisi nyingine kujitokeza kuiunga mkono Taifa Stars. Mwakilishi wa NMB, Donatus Richard, alifafanua kuwa kati ya fedha hizo, Shilingi milioni 20 zitanunua tiketi za mashabiki, na Shilingi milioni 10 zitakuwa ni motisha kwa wachezaji.
Taifa Stars, ambayo ilimaliza hatua ya makundi ikiwa kinara wa Kundi B bila kupoteza mchezo, sasa inakutana na kibarua kigumu kutoka kwa Morocco, iliyomaliza ya pili katika Kundi A. Hata hivyo, morali katika kambi ya Stars iko juu. Mhamasishaji wa timu hiyo, Ally Kamwe, amesema anaamini kikosi kilichopo kina uwezo wa kuivuka Morocco na kusonga mbele.
"Tuna kikosi kizuri ambacho ninaamini Ijumaa kitatupa heshima kwa kuifunga Morocco. Huu ni mwaka wa kuleta kombe nyumbani," alisema Kamwe. Aliongeza kuwa kampeni rasmi za uhamasishaji kwa ajili ya mchezo huo zitaanza rasmi leo Jumatano, ili kuhakikisha kila Mtanzania anakuwa sehemu ya historia itakayoandikwa siku ya Ijumaa.