Makao Makuu ya Mamlaka ya Mapato Tanzania (TRA) jijini Dar es Salaam, leo yamegubikwa na nderemo na vifijo baada ya Kamishna Mkuu wa Mamlaka hiyo, Bw. Yusuph Juma Mwenda, kupokea kwa bashasha 'mavuno' ya makombe matano yaliyonyakuliwa na timu za taasisi hiyo katika michuano mikali ya Shirikisho la Michezo la Mashirika ya Umma, Taasisi za Serikali na Mashirika Binafsi (SHIMMUTA).
Tukio hilo la kishujaa lililofanyika leo tarehe 11 Desemba 2025, ni hitimisho la kampeni kabambe ya wanamichezo wa TRA waliokuwa wakipeperusha bendera ya mamlaka hiyo kwenye michuano hiyo iliyofunga pazia lake rasmi Desemba 6, 2025. Ushindi huu unatajwa kuweka rekodi mpya kwa TRA katika historia ya ushiriki wao kwenye ligi hiyo inayokutanisha vigogo wa sekta ya umma na binafsi nchini.
Akizungumza huku akiwa amezungukwa na wanamichezo wenye nyuso za furaha, Kamishna Mwenda amesema ushindi huo si tu heshima kwa watumishi, bali ni kielelezo cha afya na utimamu wa mwili ambao ni mtaji mkubwa katika utendaji kazi wa kila siku wa kukusanya mapato ya serikali. Hata hivyo, kiongozi huyo hakusita kutoa 'nondo' za kikazi katikati ya sherehe hizo.
"Nawapongeza sana mashujaa wetu kwa kutuletea heshima hii kubwa. Haya makombe matano ni kielelezo cha nidhamu na juhudi. Lakini rai yangu kwenu ni moja; sasa tuitumie michezo hii kama jukwaa la kimkakati. Tunataka kuona michezo inakuwa sumaku ya kuwavuta wananchi, na pindi wanapokusanyika kushangilia, tuwape elimu ya kodi ili waweze kulipa kwa hiari," alisisitiza Kamishna Mwenda.
Kauli hiyo ya "Michezo na Kodi" inakuja wakati ambapo TRA inatekeleza mikakati mbalimbali ya kuwafikia walipakodi kule waliko (outreach programs). Mwenda anaamini kuwa lugha ya michezo inaeleweka kwa haraka zaidi na Watanzania na ina nguvu ya kuhamasisha uzalendo wa kuchangia pato la taifa bila shuruti.
Katika kile kinachoonekana kama habari njema kwa wapenda michezo ndani ya mamlaka hiyo, Kamishna Mwenda amebainisha kuwa Bodi ya Wakurugenzi ya TRA imepitisha rasmi Sera Mpya ya Michezo. Hatua hii ni mapinduzi makubwa kiutawala, kwani inatoa mwongozo rasmi wa jinsi michezo itakavyosimamiwa, kuwezeshwa kibajeti, na kutumiwa kama nyenzo ya kuimarisha afya za watumishi na mahusiano mema kazini.
"Sera hii mpya ni mkombozi. Itahakikisha michezo ndani ya TRA haifanyiki kwa mazoea, bali inakuwa sehemu ya utamaduni wetu wa taasisi (corporate culture) ili kujenga 'team work' na hatimaye kuongeza ufanisi katika ukusanyaji wa mapato," aliongeza Mwenda.
Ushindi huu wa TRA katika SHIMMUTA 2025 unatoa taswira mpya ya taasisi hiyo ambayo mara nyingi imekuwa ikichukuliwa kwa jicho la "kazi tu". Kwa sasa, wananchi wanapaswa kutarajia kuona TRA yenye sura ya kijamii zaidi, ikitumia viwanja vya michezo kama darasa huru la elimu ya kodi, huku ikihakikisha 'kapu la mama' linajaa kwa ajili ya maendeleo ya Taifa.