Timu ya wasichana ya Tanzania kutoka kituo cha kukuza vipaji cha Future Stars Academy cha jijini Arusha, imeliandika jina la taifa kwa wino wa dhahabu baada ya kuibuka washindi wa kombe la daraja la pili katika michuano ya Kombe la Dunia kwa watu wanaotoka kwenye mazingira magumu (Homeless World Cup). Michuano hiyo iliyokamilika jijini Oslo, Norway, imeshuhudia ushujaa wa aina yake kutoka kwa wasichana hao wanne.
Katika pambano la fainali lililokuwa la kusisimua na lenye upinzani mkali, Tanzania iliibuka kidedea kwa kuifunga timu ya Austria kwa jumla ya mabao 5-4. Mabao ya ushindi kwa Tanzania yalifungwa na mashujaa Loyce Dismas, Susan Michael, Varian Issa, na Sarah Jacob, ambao walipambana bila kuchoka kuhakikisha bendera ya Tanzania inapepea.
Ushindi huu umekuwa wa kipekee na wa kihistoria kutokana na mazingira magumu waliyokabiliana nayo. Timu hiyo ilishiriki katika mashindano hayo yaliyodumu kwa zaidi ya wiki moja ikiwa na wachezaji wanne pekee, bila kuwa na mchezaji yeyote wa akiba. Hali hii iliwalazimu kucheza kila dakika ya kila mchezo, jambo lililomvutia hata Balozi wa Tanzania anayezihudumia nchi za Nordic, Bw. Mobhare Matinyi. Balozi Matinyi aliwapongeza vikubwa wasichana hao kwa moyo wao wa kizalendo na uthubutu, akisema ushindi wao ni ishara ya uwezo mkubwa walionao Watanzania.
Michuano hiyo, iliyofanyika kuanzia Agosti 22 hadi 30, 2025, huandaliwa kila mwaka na taasisi ya Homeless World Cup yenye makao yake Uholanzi, kwa ushirikiano na shirika la Salvation Army, ikihusisha timu 60 kutoka mataifa 48 duniani.
Katika matokeo mengine kwa upande wa wanawake, Uganda waliibuka mabingwa wa jumla (daraja la kwanza) baada ya kuifunga Romania, huku Kenya wakishinda kombe la daraja la tatu kwa kuichapa Mexico. Kwa upande wa wanaume, ambapo Tanzania haikuwa na timu, Misri ndio waliobeba ubingwa mkuu, Ureno wakashinda daraja la pili na Poland wakitwaa kombe la daraja la tatu.
Hii ni mara ya kwanza kwa Tanzania kushiriki katika mashindano haya makubwa, na mafanikio haya yameweka alama isiyofutika. Michuano ijayo imepangwa kufanyika nchini Mexico.