Hali ya hewa imechafuka ghafla ndani ya viunga vya Anfield. Wakati mashabiki wa Liverpool nchini Tanzania, maarufu kama "Wazee wa You'll Never Walk Alone," wakiwa wamejiandaa kusherehekea ushindi mwingine wa kishindo, mambo yameenda mrama. Katika mchezo wa Ligi Kuu ya England (EPL) uliopigwa Jumanne usiku (Desemba 3), Liverpool imelazimishwa sare ya 1-1 na timu ngumu ya Sunderland, matokeo ambayo yamezua mjadala mzito kuhusu mchango wa 'Mfalme' Mohamed Salah.
Kichekesho na kilio cha mashabiki ni hiki: Mechi iliyopita Liverpool ilishinda bila Salah kuanza. Leo ameigia kipindi cha pili kuokoa jahazi, lakini matokeo yamekuwa sare. Je, ni bahati mbaya au mbinu za Kocha Arne Slot zimefeli?
Kipindi cha Kwanza: Liverpool Wagonga Mwamba
Mchezo ulianza kwa kasi huku Liverpool wakiwa na kikosi kazi kilichoongozwa na Alexander Isak, Florian Wirtz, na Cody Gakpo, huku Salah akianzia benchi. "Majogoo" hao walilishambulia lango la Sunderland kama nyuki. Dakika ya 9, Dominik Szoboszlai alipiga shuti kali lililookolewa kwa ustadi na kipa wa Sunderland, Robin Roefs.
Licha ya Liverpool kumiliki mpira na kutengeneza nafasi kupitia kwa Isak na Wirtz, walikutana na ukuta mgumu. Bahati haikuwa upande wao kabisa; dakika ya 44, Alexis Mac Allister alipiga shuti lililogonga mwamba wa goli na kurudi uwanjani. Sunderland nao hawakuwa wanyonge, walijibu mapigo dakika za nyongeza za kipindi cha kwanza ambapo Hemsdine Talbi aligongesha mwamba pia.
Mapumziko yalikuta ubao ukisoma 0-0, huku presha ikianza kupanda jukwaani.
Salah Aingia, Mambo Yanaharibika
Kipindi cha pili kilipoanza, Kocha Slot aliamua "kuvunja benchi" na kumwingiza Mohamed Salah akichukua nafasi ya Cody Gakpo. Matarajio yalikuwa kwamba Salah angebadilisha mchezo na kuleta mabao. Lakini, kinyume chake, Sunderland ndio waliopata nguvu.
Dakika ya 67 (Dakika ya 22 kipindi cha pili), uwanja wa Anfield ulipigwa na baridi kali. Kiungo wa Sunderland, Enzo Le Fée, alipiga pasi safi iliyomkuta Hemsdine Talbi ambaye hakufanya makosa, aliujaza mpira wavuni na kuwanyamazisha mashabiki wa nyumbani. 1-0, Sunderland wakaongoza.
Bao la 'Zali' laokoa Jahazi
Liverpool walichanganyikiwa na kuanza kushambulia hovyo. Kocha alifanya mabadiliko zaidi kwa kumwingiza Curtis Jones na Hugo Ekitike. Juhudi zao zililipa dakika ya 84, lakini si kwa bao la ufundi, bali la "bahati ya mtende." Florian Wirtz alipiga shuti ambalo lilimgonga beki wa Sunderland, Nordi Mukiele, na kubadili mwelekeo kutinga wavuni. Bao la kujifunga (Own Goal) liliipa Liverpool pumzi ya sare. 1-1.
Dakika za Mwisho: Kipa Roefs Ageuka 'Kibu'
Katika dakika saba za nyongeza, Liverpool walishambulia kama vichaa wakitaka ushindi. Federico Chiesa na Curtis Jones walipata nafasi za wazi lakini walishindwa kutumbukiza mpira wavuni. Salah naye alijaribu dakika ya 90, lakini shuti lake lilizuiwa. Kipa wa Sunderland, Robin Roefs, aligeuka shujaa kwa kuokoa michomo ya hatari dakika za lala salama, ikiwemo shuti la Ibrahima Konaté.
Sare hii ni pigo kwa Liverpool katika mbio za ubingwa, ikionyesha kuwa bado wana kazi kubwa ya kufanya kuvunja timu zinazocheza kwa kujilinda (Low Block). Kwa Sunderland, hii ni pointi ya dhahabu iliyopatikana kwenye taya za mamba.