Kocha Mkuu wa Klabu ya Yanga, Romain Folz, amewasihi wapenzi na wanachama wa timu hiyo kuwa na subira, akiahidi kuunda kikosi hatari kitakachocheza soka la kuvutia ambalo wanalitarajia. Kauli hii inakuja kufuatia mijadala miongoni mwa wadau wa soka nchini Tanzania wanaohoji muundo wa uchezaji wa timu hiyo, licha ya kupata ushindi mfululizo.
Akizungumza kuelekea mchezo muhimu wa Ligi Kuu dhidi ya Mbeya City utakaopigwa leo katika Uwanja wa Sokoine, Folz alikiri kufahamu uwepo wa wakosoaji lakini akawataka wampe muda. "Sina tatizo na wanaokosoa, lakini nawasihi waje tena baada ya miezi michache ili tuzungumze. Ninaijenga timu hii kwa malengo ya muda mrefu na kufika mbali katika mashindano yote tunayoshiriki," alisema kocha huyo. Aliongeza kuwa mabadiliko anayoyafanya kikosini yana sababu za kimbinu na anajua fika wapi anataka timu yake ifike.
Licha ya ukosoaji huo, takwimu za Folz tangu aanze kuinoa Yanga zinambeba. Ndiye kocha mwenye mwanzo bora zaidi klabuni hapo kwa misimu ya hivi karibuni, akiwapita watangulizi wake kama Nasredine Nabi na Miguel Gamondi. Katika michezo sita aliyosimama kama mkuu wa benchi la ufundi, timu yake imeshinda yote, ikifunga jumla ya mabao 13 na bila kuruhusu wavu wao kuguswa hata mara moja. Hii ni rekodi ya kipekee inayoonyesha ukuta imara wa ulinzi alioujenga.
Mafanikio hayo ni pamoja na ushindi wa 3-0 dhidi ya Rayon Sports nchini Rwanda, 1-0 dhidi ya Bandari FC kwenye Wiki ya Mwananchi, ushindi wa 1-0 dhidi ya watani wao Simba SC kwenye Ngao ya Jamii, na ushindi wa 2-0 dhidi ya Wiliete de Benguela ugenini kwenye Ligi ya Mabingwa Afrika.
Kuhusu pambano la leo dhidi ya Mbeya City, Folz alikiri kuwa halitakuwa jepesi lakini amekijenga kikosi chake kupambana kwa ajili ya alama tatu. "Tunajua ligi ni ndefu na kila mchezo ni muhimu. Tumejiandaa vizuri kukabiliana na Mbeya City ingawa tunawaheshimu kama mpinzani wetu," alieleza.
Kwa upande mwingine, Kocha wa Mbeya City, Malale Hamsini, ameitangazia Yanga vita, akisema wamejipanga kikamilifu kuwakabili Mabingwa Watetezi. "Maandalizi yetu yamekamilika kimbinu na kisaikolojia. Hatuangalii rekodi za nyuma za Yanga kwa sababu hawajacheza na sisi. Tunataka ushindi na tutaingia uwanjani tukiwa na washambuliaji wawili," alisema Hamsini, akionyesha nia ya kucheza soka la kushambulia.