Lamine Yamal, kinda mwenye umri wa miaka 17 anayeichezea klabu ya FC Barcelona na timu ya taifa ya Hispania, amejikuta katikati ya skendo kubwa inayotishia kuchafua sifa yake, siku chache kabla ya kutimiza umri wa miaka 18. Mwanamitindo na mrembo mmoja nchini Hispania ametoa madai mazito kwamba Yamal, kupitia kwa wawakilishi wake, alimtaka alete wanawake kadhaa kwenye sherehe yake ya kuzaliwa, huku akitoa masharti maalum ya sura na maumbile yao.
Sherehe hiyo ya kifahari imepangwa kufanyika Julai 13 jijini Barcelona, na inasemekana itahudhuriwa na watu maarufu duniani kama vile dereva wa F1, Lewis Hamilton, na wanamuziki mashuhuri. Hata hivyo, siri nzito zimeanza kufichuka baada ya mrembo aitwaye Claudia Calvo kudai kuwa alialikwa lakini alikataa baada ya kupewa maagizo ya ajabu.
Akiongea kwenye kituo kimoja cha televisheni, Calvo alifichua: "Nilikataa mwaliko wa Yamal. Upande wake ulinitaka nije na wanawake wengine 12. Walitaka wanawake watakaochaguliwa kwa kuangalia sura zao pekee." Aliongeza kuwa mambo yalikuwa mabaya zaidi, "Walinipa maelezo ya vigezo maalum vya kimwili walivyovitaka, hadi wakataja hata rangi ya nywele. Nilichukizwa sana, na ndiyo maana nilikataa."
Utata uliongezeka zaidi baada ya kipindi cha televisheni cha 'Espejo Público' kudai kuwa wanawake watakaohudhuria sherehe hiyo watapewa kadi zenye kiasi cha pesa kati ya Euro 10,000 na 20,000 (takriban Shilingi milioni 30 hadi 60 za Kitanzania), jambo linaloashiria kuwa walikuwa wanalipwa ili kuhudhuria.
Hadi sasa, Lamine Yamal mwenyewe hajatoa kauli yoyote kuhusu tuhuma hizi nzito. Hata hivyo, mjomba wake anadaiwa kuzungumza na mwanahabari mmoja na kukanusha kila kitu.
"Madai yote yaliyotolewa ni ya uongo mtupu," mwanahabari huyo alimnukuu mjomba wa Yamal akisema. "Nina hakika hawa ni watu wa upande wa Real Madrid wanaosambaza uvumi huu. Wanafanya hivi kwa sababu hawawezi kukubali kwamba Yamal ndiye mchezaji bora zaidi duniani." Mjomba huyo alimalizia kwa kutoa ombi moja: "Tafadhali, mwacheni Yamal apumzike."
Madai haya yanakuja wakati Yamal akiwa kwenye kilele cha mafanikio. Alicheza Fainali za Euro 2024 na kuisaidia Hispania kutwaa ubingwa huku akitawazwa kuwa mchezaji bora kinda na mtoaji mkuu wa pasi za mabao. Wengi wanamwona kama mrithi halali wa Lionel Messi. Sasa, dunia inasubiri kuona ukweli utakuwa upi katika sakata hili linalogubika sherehe yake ya kutimiza umri wa miaka 18.