Baada ya tetesi za muda mrefu, hatimaye safari ya miaka minane ya golikipa mahiri, Aishi Manula, ndani ya klabu ya Simba imefikia tamati, na sasa ameanza ukurasa mpya kwa kurejea rasmi nyumbani, Azam FC. Uongozi wa Klabu hiyo umeweka wazi kuwa uhamisho huu wa kihistoria umechochewa na mambo makuu matatu, huku pendekezo la Kocha Mkuu, Florent Ibenge, likiwa la kwanza na la muhimu zaidi.
Akizungumza na wanahabari, Afisa Habari wa Azam FC, Thabit "Zaka Zakazi" Zakaria, alifafanua kuwa kocha Ibenge ndiye aliyependekeza usajili wa Manula, akitambua ubora na uzoefu mkubwa wa mlinda mlango huyo namba moja wa Tanzania. "Ujio wa Manula ni pendekezo la mwalimu. Tusingeweza kumsajili mchezaji wa hadhi yake bila baraka za benchi la ufundi. Kocha anajua thamani yake na anaamini ataleta mafanikio makubwa kikosini," alisema Zaka Zakazi.
Sababu ya pili iliyotajwa kurahisisha "homecoming" hii ni fursa ya upatikanaji wake. Manula alikuwa amemaliza mkataba wake na Simba SC, hali iliyoifanya Azam FC kutokuwa na kizuizi cha ada ya uhamisho. Hii ilitoa nafasi nzuri kwa klabu hiyo kumrejesha mchezaji wake wa zamani bila vikwazo vingi vya kifedha.
Nguzo ya tatu na ya muhimu iliyokamilisha dili hili ni uhusiano wa kihisia na heshima. Manula ni "kijana wa nyumbani" aliyekulia na kupata jina kupitia akademi ya Azam. Umaarufu wake nchini, pamoja na ubora wake usiopingika, vilifanya uongozi usisite kumfungulia milango ya kurejea Chamazi. "Tumeangalia mambo mengi; ubora wake, ni kipa anayejulikana, na kubwa zaidi, ni kijana wetu anarudi nyumbani. Kila mmoja alikuwa amemmisi mwenzake," aliongeza Zaka Zakazi.
Manula, ambaye aliondoka Azam mwaka 2017 na kujiunga na Simba, sasa amesaini mkataba wa miaka mitatu utakaomweka katika viunga vya Azam Complex hadi mwaka 2028. Wakati huohuo, tetesi zinaendelea kumhusisha kiungo Himid Mao, mchezaji mwingine wa zamani wa Azam, na uwezekano wa kurejea kikosini, ingawa uongozi umesema utaweka kila kitu wazi usajili utakapokamilika.