Mji wa Kahama, ambao uliwahi kufurahia neema ya kupata maji safi kutoka Ziwa Victoria kupitia mradi mkubwa wa Kitaifa uliogharimu zaidi ya shilingi bilioni 200, sasa unakumbwa na wimbi la wizi wa mita za maji. Hali hii inatishia kurudisha wakazi katika utaratibu wa kutumia maji ya visima, na inasababisha hasara kubwa kwa Mamlaka ya Majisafi na Usafi wa Mazingira Kahama (KUWASA) pamoja na wananchi wenyewe.
Wizi huu, unaofanyika hasa nyakati za usiku, unahusishwa na kuibuka kwa wanunuzi wa vyuma chakavu. Hili linapelekea sio tu kupotea kwa mita za maji zenye thamani, bali pia upotevu wa maji kwa kiasi kikubwa huku yakimwagika ovyo. Mwenyekiti wa Bodi ya KUWASA, Stewart Bulaya, amethibitisha kuwa wizi huu umeanza kuongezeka tangu Oktoba mwaka jana, na hadi sasa, mita 547 zenye thamani ya zaidi ya shilingi milioni 65.64 zimeibiwa. Wateja wanapaswa kulipa kiasi cha shilingi 120,000 ili kufungiwa mita mpya, hali inayowaweka katika wakati mgumu. Kutokana na gharama hizo, ni wateja 345 tu kati ya 547 ndio walioweza kulipa na kurejeshewa huduma.
Mwenyekiti huyo wa bodi ya KUWASA alikiri kuwa wamepoteza mapato mengi kwa kukosa usomaji sahihi wa matumizi ya maji, jambo linaloathiri pia mipango ya kuunganisha wateja wapya. Amefafanua kuwa uvumi usio na ukweli kwamba mita hizo zina madini, ndio chanzo cha wizi huu. Aliongeza kuwa mita nyingi zilizoibiwa hupatikana kwa wanunuzi wa vyuma chakavu au hutupwa kwenye vichaka.
Wakazi wa Kahama wamelalamikia hali hii, wakisema imekuwa jambo la kawaida kuona maji yakitapakaa barabarani na mitaroni baada ya mita kuibwa. Baadhi yao, kama Hamza Rashidi, wanaamini kuwa wimbi hili la wizi lina uhusiano wa moja kwa moja na shughuli za ununuzi wa vyuma chakavu. Kabla ya biashara hiyo kushamiri, wizi wa vyuma kama sufuria na hata mita za maji ulikuwa nadra.
Kutokana na hali hii, Kamati ya Ulinzi na Usalama ya Mkoa wa Shinyanga imeanza kuchukua hatua. Kamanda wa Polisi wa Mkoa wa Shinyanga, SACP Janeth Magomi, ametangaza vita dhidi ya wezi hao. Alithibitisha kuwa tayari wameshawakamata baadhi ya mafundi vishoka wanaodaiwa kuhusika na wizi huo na kuahidi kuendelea na operesheni hadi waweze kuwafichua na kuwachukulia hatua kali za kisheria. Aidha, Mwenyekiti wa Kata ya Nyahanga, Felician Shija, amesisitiza umuhimu wa wananchi kushirikiana na serikali katika ulinzi, na amewataka wakazi kufunga vizimba vya chuma kwenye mita zao na kuweka taa za nje ili kuwaweka salama.