Wimbi la wizi wa ajabu limeikumba Mamlaka ya Majisafi na Usafi wa Mazingira Kahama (KUWASA), ambapo wezi wameng'oa na kuiba jumla ya mita za maji 547, na kuisababishia mamlaka hiyo hasara ya zaidi ya Shilingi milioni 65.6. Imebainika kuwa wimbi hili linachochewa na uvumi wa uongo unaosambazwa kuwa ndani ya mita hizo kuna madini ya thamani.
Akizungumza na wanahabari leo, Julai 26, 2025, Mwenyekiti wa Bodi ya KUWASA, Stewart Bulaya, alisema wizi huo umekuwa janga kubwa linalosababisha upotevu mkubwa wa maji, hasara za kifedha, na usumbufu mkubwa kwa wananchi wanaokosa huduma hiyo muhimu.
"Tumeshuhudia ongezeko kubwa la wizi huu tangu Oktoba mwaka jana. Thamani ya mita 547 zilizoibiwa ni Shilingi milioni 65.64, fedha ambazo zingeweza kutumika kuwaunganishia maji wateja wapya zaidi ya 500," alisema Bulaya. "Cha kusikitisha ni kwamba baadhi ya watu wanashiriki wizi huu wakidanganywa kuwa mita hizi zina madini ndani yake, jambo ambalo si kweli hata kidogo. Ni uhuni na uhujumu wa miundombinu."
Maeneo yaliyoathirika zaidi na wimbi hili la wizi ni pamoja na Kata ya Malunga ambapo mita 212 zimeibwa, ikifuatiwa na Nyahanga (mita 167), na Majengo (mita 112).
Bulaya alieleza athari nyingine za wizi huo ni pamoja na upotevu wa mapato kwa KUWASA kwani maji mengi humwagika na mengine kutumika bila kusomwa, na pia malalamiko kutoka kwa wateja ambao hulazimika kulipia tena gharama za mita mpya baada ya kuibiwa.
Mamlaka hiyo sasa imesema inashirikiana kwa karibu na Jeshi la Polisi mjini Kahama ili kuwasaka na kuwachukulia hatua kali za kisheria watu wote wanaojihusisha na wizi huo na wale wanaonunua mita hizo zilizoibwa. Aidha, ametoa wito kwa jamii kutoa taarifa kwa siri kuhusu watu wanaojihusisha na uhalifu huo ili kulinda miundombinu muhimu ya maji.