Wanawake wa Mkoa wa Dar es Salaam wamehimizwa kutumia nguvu na ushawishi wao mkubwa kama "jeshi kubwa" katika kulinda na kuenzi amani na utulivu wa nchi, kuelekea Uchaguzi Mkuu unaokaribia.
Wito huo umetolewa na Mwenyekiti wa Jumuiya ya Wanawake wa Kiislamu Mkoa wa Dar es Salaam (JUWAKITA), Mariam Mtambo, wakati wa Kongamano la Wanawake wa Mkoa huo. Mtambo alisisitiza kwamba mwanamke ni uti wa mgongo wa ustawi wa jamii na nguzo muhimu katika kulijenga taifa imara.
Wanawake Ndio Kichocheo cha Amani Familia
Mtambo aliwataka wanawake wawe imara kuitangaza amani kuanzia ngazi ya familia kuelekea Uchaguzi Mkuu. Alisisitiza wanapaswa kupaza sauti zao na kuongea na waume zao, watoto wao, na makundi mengine ya vijana kuhusu umuhimu wa kuhubiri amani, akionya kuwa amani ikitoweka kuirudisha ni ngumu sana.
"Tanzania ni nchi ya amani ndugu zangu, uchaguzi sio vita na wala sio ugomvi, hatutakiwi kuogopa kwenda kupiga kura. Tujitokeze tukapige kura, tuchague viongozi sahihi tusiwe na akili za kushikiwa," alisema Mtambo, akiwahimiza wanawake kutumia haki yao ya msingi ya kikatiba.
Polisi na UWT Waunga Mkono
Msemaji wa Jeshi la Polisi Tanzania, David Misime, aliuomba kundi hilo la wanawake wapaze sauti na kuwa mabalozi wa kuilinda amani, akisema suala la ulinzi na usalama ni la Watanzania wote na kwamba kundi la wanawake lina nguvu kubwa katika jamii.
Kauli hiyo iliungwa mkono na Mwenyekiti wa Umoja wa Wanawake (UWT) Mkoa wa Dar es Salaam, Mwajabu Mbwambo. Mbwambo alisema wanawake wakisimamia vizuri dhana ya amani, Tanzania itaendelea kuwa na amani na utulivu. Alibainisha kuwa zaidi ya Wanawake Milioni mbili, sawa na asilimia 48 ya wapiga kura, wanatarajiwa kupiga kura katika Mkoa wa Dar es Salaam, idadi inayoonesha uzito wa kundi hilo.