Vyombo vya habari nchini vimehimizwa vikali kuzingatia uwiano wa kijinsia na ushirikishwaji mpana wa makundi maalum, ikiwemo wanawake, vijana, na watu wenye ulemavu, katika kuripoti habari za uchaguzi. Rai hii imetolewa leo Juni 19, 2025, na Mwenyekiti wa Chama cha Wanahabari Wanawake Tanzania (TAMWA), Joyce Shebe, wakati wa ziara yake maalum katika makao makuu ya The Guardian Limited. Ziara hii inakuja huku Shebe akijiandaa kuhitimisha kipindi chake cha pili cha uongozi ndani ya TAMWA.
Shebe alisisitiza kuwa, ingawa sekta ya habari imepiga hatua kubwa, bado kuna changamoto kubwa katika kuhakikisha usawa wa kijinsia unaakisiwa kikamilifu, hasa wakati wa uchaguzi. Mara nyingi, sauti za makundi maalum zimekuwa zikikosa uwakilishi wa kutosha, na nafasi nyingi zimekuwa zikichukuliwa na sauti za wanasiasa pekee. "Vyombo vya habari vina nafasi ya kipekee katika kujenga jamii jumuishi. Tuwe na taarifa zinazowakilisha kila kundi, sio tu wanasiasa,” alisisitiza Shebe, akisisitiza umuhimu wa ushirikishwaji wa jamii nzima.
Akitoa pongezi kwa kampuni ya The Guardian Limited, Shebe alisema: "Nawapongeza kwa kushiriki Tuzo za Samia Kalamu Award na hata kushinda, ni ushahidi kuwa mna waandishi wenye weledi na uongozi bora. Hii ni kazi ya mfano. Wapo baadhi ya vyombo havikuwasilisha kazi, lakini ninyi mlifanya vizuri na kazi zenu zilionesha kujibu mahitaji ya jamii.” Aliongeza kuwa TAMWA imekuwa ikitoa mafunzo ya mara kwa mara kwa waandishi wa habari, lengo likiwa ni kuwajengea uwezo katika masuala ya jinsia na kuwawezesha wanawake kuchukua nafasi za uongozi, uhariri, na hata kazi za upigaji picha, ambazo kihistoria zimetawaliwa na wanaume.
Shebe alitumia fursa hiyo kushukuru The Guardian Limited kwa ushirikiano waliompa wakati wa uongozi wake, akitambua uwepo wa wanachama hai wa TAMWA ndani ya ofisi hiyo. "Nimetembelea ofisi hii kuwashukuru kwa ushirikiano wakati wa uongozi wangu. Ninatambua pia uwapo wa wanachama hai wa TAMWA hapa ndani. Nawashukuru sana. Sasa naelekea kumaliza muda wangu na nitaendelea kuwa mshauri,” alifafanua.
Akijibu wito huo, Mhariri Mtendaji wa Gazeti la Nipashe, Beatrice Bandawe, alibainisha kuwa chombo chao kimekuwa mstari wa mbele katika kuzingatia usawa wa kijinsia katika kazi zao za kihabari. "Tumekuwa tukizingatia uwiano sahihi katika habari zetu, hasa kipindi cha uchaguzi. Mwaka jana tulitambuliwa na Chuo Kikuu cha Aga Khan Research Institute, kwenye utafiti wao kuwa Nipashe ni gazeti namba moja kwa Tanzania na wa nne Afrika Mashariki kwa kuandika habari za usawa wa kijinsia,” alisema Bandawe, akionyesha takwimu zinazothibitisha juhudi zao.
Naye Mhariri Mtendaji wa Gazeti la The Guardian, Wallace Mauggo, alithibitisha kuwa hakuna ubaguzi wa kijinsia ndani ya gazeti hilo tangu aanze kazi mwaka 1994. “Toka nimeanza hapa, tumekuwa tukiheshimu na kuzingatia usawa wa kijinsia katika kila hatua ya uhariri na uchapishaji wa habari. Hii ni sehemu ya utamaduni wetu wa kazi,” alieleza Mauggo.
Akihitimisha, Naibu Mkurugenzi Mkuu wa The Guardian Limited, Jackson Paulo, aliishukuru TAMWA kwa kutambua mchango wa kampuni hiyo katika tasnia ya habari na kupongeza uongozi wa Shebe kwa ushirikiano wao mzuri na vyombo vya habari. “Tuzo za Samia Kalamu mliotutunuku ni heshima kubwa kwetu. Tutaendelea kuwa mstari wa mbele katika kuhakikisha tunasimamia usawa na taaluma bora ya habari,” alihitimisha Jackson.