Akiweka bayana mkakati wa chama chake katika kuinua wakulima, mgombea urais kupitia Chama cha UDP, Saum Rashid, ameahidi kuufanya Mkoa wa Singida kuwa kitovu kikuu cha kimataifa cha biashara ya mafuta ya alizeti. Ahadi hiyo inajumuisha ujenzi wa soko kubwa la kisasa litakalotoa fursa kwa wakulima kuuza mazao yao kwa bei ya uhakika na yenye tija.
Akihutubia wananchi katika soko la Misufini mjini Singida mnamo Septemba 19, 2025, Saum alisema ni jambo la kusikitisha kuona Mkoa wa Singida, ambao ni maarufu kwa uzalishaji wa alizeti nchini, wakulima wake wakiendelea kukabiliwa na changamoto ya soko la kudumu. Alisema serikali itakayoundwa na UDP itaipa sekta ya kilimo kipaumbele cha juu kwa kuwa ndiyo inayotegemewa na idadi kubwa ya Watanzania.
"Tuna mpango kabambe wa kumaliza kilio cha wakulima wa alizeti. Hatutajenga tu soko la kimataifa, bali tutaanzisha mashamba darasa ili kuwapa wakulima teknolojia ya kisasa ya kuzalisha alizeti bora na kwa wingi," alieleza Saum. Aliongeza kuwa mkakati huo utaenda sambamba na ujenzi wa viwanda vya kusindika mafuta ili kuongeza thamani ya zao hilo.
Mgombea huyo alisisitiza kuwa serikali yake itaelekeza nguvu kubwa katika uwekezaji kwenye mnyororo mzima wa thamani wa zao la alizeti. Lengo ni kuhakikisha kuwa kuanzia mkulima anayelima, hadi anayesindika, kusafirisha na kuuza, wote wananufaika na fursa za ajira na biashara zitakazozalishwa. "Hatutaki tena kusikia mkulima anabaki na zao lake shambani kwa kukosa mnunuzi; tutahakikisha soko linamfuata mkulima," alihitimisha.