Mgombea urais kupitia Chama cha Kijamii (CCK), David Mwaijojele, ameweka hadharani sera ya kipekee na ya kijasiri inayolenga kutatua changamoto ya makazi nchini, akiahidi kuwa endapo atachaguliwa, serikali yake itaanzisha mpango wa kuwajengea nyumba watumishi wote wa umma na wananchi wa kawaida. Ametoa ahadi hiyo baada ya kuchukua fomu ya kuwania urais katika ofisi za Tume Huru ya Taifa ya Uchaguzi (INEC) jijini Dodoma.
Mwaijojele alifafanua kuwa kipaumbele chake kikuu ni kuwaandalia wastaafu mazingira bora ya maisha, akitambua kuwa watumishi wengi wa umma huogopa kustaafu kwa kuhofia maisha baada ya utumishi, hasa kutokana na kutokuwa na makazi ya kudumu. Alisema hali hii huwafanya wengine kung'ang'ania ajira na hivyo kuzuia fursa kwa vijana kuajiriwa.
Ili kutatua tatizo hili, Mwaijojele alisema serikali yake itawaondolea kodi watumishi wa umma na badala yake itaanzisha utaratibu wa kukata tozo maalum kutoka kwenye mishahara yao. Fedha hizo zitaingizwa kwenye mfuko maalum utakaogharamia ujenzi wa nyumba zao, ili pindi muda wao wa kustaafu unapofika, waweze kukabidhiwa nyumba zao na kustaafu kwa amani, wakipisha damu changa kuingia kwenye utumishi.
Sera hiyo haitaishia kwa watumishi wa umma pekee. Kwa wananchi wa kawaida, mgombea huyo wa CCK aliahidi kuwa serikali yake itaweka mkakati ambapo kila mwananchi atachangia kiasi fulani cha fedha mwishoni mwa mwaka, na serikali itaongeza fedha nyingine ili kumsaidia mwananchi huyo kuanza ujenzi wa nyumba yake, hata kama itakuwa ni ya chumba kimoja. "CCK tuna sera na ilani nzuri kuliko vyama vyote vya siasa," alijigamba Mwaijojele, huku akiahidi pia kuboresha mazingira ya kazi kwa waandishi wa habari.
Pamoja na kuweka mkazo mkubwa kwenye sera ya makazi, mgombea huyo alitaja elimu, afya na kilimo kama vipaumbele vingine vya serikali yake, ambavyo aliahidi kuvifafanua kwa kina baada ya kupitishwa rasmi na INEC kugombea.