Taharuki imetanda kwenye mitandao ya kijamii nchini Tanzania kufuatia kusambaa kwa madai mazito kwamba aliyekuwa Balozi wa Tanzania nchini Cuba, Humphrey Polepole, ametekwa na watu wasiojulikana. Hali hiyo imelilazimu Jeshi la Polisi kutoa kauli rasmi, huku likifichua kuwa Polepole alikuwa tayari anatafutwa na Mkurugenzi wa Upelelezi wa Makosa ya Jinai (DCI).
Gumzo hilo lililipuka baada ya kusambaa kwa video ya mtu anayejitambulisha kama Agustino Polepole, kaka wa Balozi huyo, akidai kwa hisia kwamba ndugu yake alichukuliwa kwa nguvu usiku wa kuamkia Oktoba 6, 2025. Madai hayo yalichochewa zaidi na video nyingine inayoonyesha sakafu yenye michirizi ya damu, inayosemekana kuwa ni kutoka ndani ya nyumba alimokuwa akiishi Polepole.
Akijibu taharuki hiyo, Msemaji wa Jeshi la Polisi, ACP David Misime, amethibitisha kuwa jeshi hilo limeziona taarifa hizo na limeanza uchunguzi wa kina ili kubaini ukweli wa mambo. Hata hivyo, ACP Misime aliongeza kuwa, kabla ya madai haya ya kutekwa, Balozi Polepole alikuwa tayari amepelekewa wito rasmi wa kisheria kumtaka aripoti katika ofisi ya DCI.
"Ni kweli alitakiwa kufika ofisi ya DCI kwa ajili ya mahojiano kuhusu tuhuma mbalimbali alizokuwa akizitoa kupitia mitandao ya kijamii. Barua ya wito ilitumwa kwake kihalali, lakini hadi sasa hakuwa ameitikia wito huo," alisema ACP Misime, akiongeza kuwa jeshi linaendelea na uchunguzi pande zote mbili.
Wakati jeshi likiendelea na uchunguzi, uhalali wa video zinazosambaa haujathibitishwa rasmi, na kuacha umma na maswali mengi kuhusu usalama wa mwanasiasa huyo na ukweli halisi unaozunguka kutoweka kwake.