Mwanasiasa na kiongozi mzoefu nchini, Paul Kimiti, ametoa tathmini yake kuhusu mwenendo wa kampeni za uchaguzi mkuu wa mwaka huu, akigusia masuala kadhaa muhimu yanayotikisa medani ya siasa, ikiwemo kauli mbiu ya CHADEMA ya 'No Reform No Election', matumizi ya fedha kwenye siasa, na mustakabali wa vyama vya upinzani.
Akizungumza katika mahojiano maalum, Kimiti alisema kuwa dai la CHADEMA la kutaka mageuzi kabla ya uchaguzi lilikuwa na nia njema lakini lilichelewa. Alisema, "Huwezi kuleta hoja ya 'No Reform No Election' zikiwa zimebaki miezi mitatu au minne kabla ya uchaguzi. Mambo haya yanahitaji mchakato mrefu wa kisheria na kikatiba. Walipaswa kulishughulikia suala hili mapema zaidi."
Aidha, alieleza kuwa ingawa kumekuwa na mwitikio mkubwa wa watu katika mikutano ya kampeni, hiyo si kigezo cha uhakika cha idadi ya watakaopiga kura. Alitahadharisha kuwa baadhi ya wananchi huhudhuria ili kusikiliza sera za wagombea bila hata kuwa wamejiandikisha, huku wengine wakikatishwa tamaa na misururu mirefu siku ya uchaguzi. Alishauri serikali kutafakari uwezekano wa kuongeza vituo vya kupigia kura ili kurahisisha zoezi hilo.
Kuhusu nguvu ya upinzani, Kimiti alisema kuwa mgawanyiko ndani ya CHADEMA umedhoofisha ushindani katika uchaguzi huu. "Niliwahi kusema kuwa baada ya uchaguzi wao wa ndani, CHADEMA haitakuwa moja. Matokeo yaliyokaribiana sana kati ya Freeman Mbowe na Tundu Lissu yamepasua chama katikati," alieleza.
Moja ya changamoto kubwa aliyoianisha ni janga la matumizi ya fedha katika kupata nafasi za uongozi. Alikemea vikali tabia ya wagombea kutumia pesa kununua kura, akisema inawanyima nafasi viongozi wenye sifa lakini wasio na uwezo kifedha. "Tunaanza kuiharibu nchi yetu kwa kuchaguana kwa misingi ya fedha. Kiongozi anayetumia hongo hajiamini, na akipata madaraka atatumia wadhifa wake kurudisha fedha zake. Lazima tuweke mfumo madhubuti wa kukomesha tabia hii," alisisitiza.
Vilevile, mwanasiasa huyo mkongwe alionyesha wasiwasi wake kuhusu matumizi mabaya ya mitandao ya kijamii, akisema inaweza kuvuruga amani ya nchi kutokana na usambazaji wa taarifa za uongo. Alitoa wito kwa Watanzania kutumia busara zao badala ya kuamini kila kitu wanachokiona mtandaoni.
Hata hivyo, alimsifu mgombea urais kupitia CCM, Rais Samia Suluhu Hassan, kwa kuendesha kampeni za kistaarabu zinazojikita katika hoja na utekelezaji wa ahadi. "Mama anatumia lugha nzuri, hawatishi watu, na anaeleza kwa vitendo kile alichokifanya na anachotarajia kukifanya. Kauli mbiu yake ya 'Kazi Iendelee' inaonesha mwendelezo na utulivu," alibainisha Kimiti.