Katika hali ya sintofahamu kuelekea Uchaguzi Mkuu wa kesho, Mgombea Urais wa Zanzibar kupitia Chama cha ACT Wazalendo, Othman Masoud Othman (ambaye pia ni Makamu wa Kwanza wa Rais wa Zanzibar), ameibua tuhuma nzito dhidi ya Tume ya Uchaguzi Zanzibar (ZEC), akidai kuwa kura ya mapema imepangwa kutumika kama njia ya kuhujumu matokeo.
Akizungumza na waandishi wa habari mjini Zanzibar jana, Othman alisema chama chake hakina imani na uhalali wa kura hiyo inayopigwa leo (Oktoba 28), akidai kuwa imekiuka misingi ya kisheria na kimaadili. "Kura ya mapema imeanzishwa kwa lengo la kufanikisha wizi wa kura," alidai Othman. Aliongeza kuwa ZEC imezidisha ubaya kwa kuendesha mchakato huo kinyume cha sheria, huku akidai orodha ya wapigakura wa mapema ni kubwa kupita kiwango kinachoruhusiwa kisheria.
Mbaya zaidi, Othman alidai orodha hiyo imejumuisha wapigakura wa kawaida na hata majina ya watu waliokwishafariki dunia, akisema hilo linaashiria njama za kuhalalisha udanganyifu. Tuhuma zake hazikuishia hapo; alidai kuna mikakati mingine ya hujuma ikiwemo kuondolewa kwa mawakala wa ACT Wazalendo vituoni na kuandaliwa kwa matokeo bandia yanayotaka kutangazwa badala ya yale yatakayotoka vituoni.
Kama tahadhari, Othman alisema ACT Wazalendo imepata taarifa za mpango wa kufuta uchaguzi katika baadhi ya majimbo ya Unguja, akitaja maeneo kama Pangawe, Mwanakwerekwe, Kijini, Nungwi na Malindi, kwa madai kuwa chama tawala hakina uhakika wa ushindi huko. "Wana mpango wa kufanya marejeo yatakayosusiwa, na hivyo kuwapitisha wagombea wao bila ushindani wa kweli," alidai. Hata hivyo, Othman alisisitiza kuwa chama chake kitaingia katika uchaguzi huo kwa amani, huku wakiwa tayari "kukubali matokeo endapo uchaguzi utakuwa huru na wa haki."
ZEC Yapiga Meza Kofi, Yakanusha Vikali
Kama ilivyotarajiwa, Mwenyekiti wa Tume ya Uchaguzi Zanzibar (ZEC), Jaji George Joseph Kazi, amepinga vikali madai hayo. Alisema tuhuma hizo hazina ukweli wowote na zinalenga kuchochea hofu kwa wananchi.
Jaji Kazi alifafanua kuwa kura ya mapema si siri, bali ni matokeo ya mapendekezo ya waangalizi wa kimataifa baada ya Uchaguzi wa 2015, ambapo baadhi ya maofisa wa ZEC na ulinzi walikosa fursa ya kupiga kura. Alisisitiza kuwa ilianzishwa kwa mujibu wa sheria na mwongozo rasmi, na "hakuna wizi wala upendeleo" unaohusiana na mchakato huo.
Akimlenga Othman, ambaye kitaaluma ni mwanasheria, Jaji Kazi alisema: "Tuhuma kwamba kuna majina ya wafu ni za kubuni. Ni aibu kuona mtu mwenye taaluma ya sheria akitoa taarifa za uongo na za uchochezi." Alikumbusha jinsi tuhuma za ACT Wazalendo zilivyokanushwa katika uchaguzi mdogo wa Jimbo la Mtambwe.
Jaji Kazi alihimiza kuwa ZEC itaendesha uchaguzi kwa mujibu wa sheria, kanuni na taratibu na kwamba kila kura itahesabiwa kwa uwazi. Aliwataka wananchi wapuuze taarifa za upotoshaji na wajitokeze kwa wingi kupiga kura kwa amani.