Mgombea urais kupitia Chama cha Ukombozi wa Umma (CHAUMMA), Bw. Salum Mwalimu, ametangaza vita kamili dhidi ya kampuni na taasisi za mikopo zenye riba kubwa na masharti kandamizi, maarufu nchini kama "kausha damu." Akizungumza kwenye mikutano yake ya kampeni, Mwalimu ameahidi kuwa endapo wananchi watampa ridhaa ya kuongoza nchi, moja ya hatua zake za kwanza itakuwa ni kupiga marufuku kabisa biashara hiyo anayoiona kama chanzo cha umasikini na mateso kwa Watanzania wengi.
Bw. Mwalimu alisema ni jambo la kusikitisha na lisilokubalika kuona uchumi wa nchi unategemea mfumo unaowanyonya wananchi wake, ambapo watu wenye uhitaji wanakimbilia mikopo hiyo kwa matumaini ya kujikwamua, lakini wanajikuta wakizama zaidi kwenye lindi la madeni na umasikini. Alieleza kuwa hali hii inachangiwa na kukosekana kwa sera madhubuti za serikali za kuwawezesha wananchi kiuchumi.
"Kuruhusu uchumi wa nchi yetu uendeshwe kwa falsafa ya 'kausha damu' ni sawa na kumkufuru Mwenyezi Mungu. Hatuwezi kuendelea hivi. Nikiingia madarakani, natoa amri ya kupiga marufuku kampuni zote zinazowaletea wananchi mikopo hii ya kinyonyaji," alisisitiza Mwalimu.
Alifafanua kuwa serikali atakayoiunda haitaishia tu kupiga marufuku, bali itakuja na mpango mbadala na wa kudumu. Mpango huo utajikita katika kuunda sera za maendeleo zinazolenga kuinua kipato halisi cha mwananchi mmoja mmoja. Lengo kuu, alisema, ni kujenga mazingira ambayo mwananchi hatakuwa na sababu ya kukimbilia mikopo ya umiza, kwani atakuwa na uwezo wa kiuchumi wa kukidhi mahitaji yake na kukuza mtaji wake.
Sera ya CHAUMMA, kwa mujibu wa mgombea huyo, ni kuhakikisha kuwa fursa za kiuchumi zinawafikia walio wengi na sio kuwaacha wananchi mikononi mwa wafanyabiashara wachache wanaojitajirisha kupitia jasho na damu ya mamilioni ya Watanzania.