Mchungaji Peter Msigwa, ambaye hapo awali alihusishwa na tetesi za kurejea katika chama chake cha zamani, Chadema, amepewa jukumu muhimu na Chama Cha Mapinduzi (CCM) la kuongoza harakati za ushindi wa chama hicho katika Kanda ya Nyasa.
Akihutubia maelfu ya wanachama wa CCM mjini Iringa, Katibu wa NEC, Itikadi, Mafunzo na Uenezi wa CCM, CPA Amos Makalla, alifafanua kuwa wale waliokuwa na matarajio kuwa Msigwa angerudi Chadema walikuwa wanapoteza muda wao. Alisisitiza kuwa Msigwa ni “mtoto wa Chama cha Mapinduzi,” na hana nia ya kurudi upinzani.
Akizungumza katika mkutano huo uliofanyika leo kwenye uwanja wa Mwembetogwa, CPA Makalla alikosoa vikali kauli za wapinzani kuhusu mchakato wa Katiba Mpya, akidai kuwa wanazingatia zaidi maslahi yao ya kisiasa badala ya ustawi wa wananchi wa kawaida, ikiwa ni pamoja na wakulima, wafugaji, na makundi mengine ya kijamii.
Akitoa elimu kuhusu mabadiliko ya sheria za uchaguzi, Makalla alieleza kuwa mchakato wa maboresho ya sheria umezingatia maoni ya wananchi, hatua iliyochangia kupitishwa kwa sheria mbili muhimu: Sheria ya Tume Huru ya Taifa ya Uchaguzi, ambayo inatoa nafasi kwa wananchi wenye sifa kuomba nafasi katika tume hiyo kupitia mchakato wa uteuzi chini ya Jaji Mkuu na Jaji wa Zanzibar. Na Sheria ya Uchaguzi wa Rais, Wabunge, na Madiwani, ambayo inaondoa wakurugenzi wa halmashauri kuwa wasimamizi wa uchaguzi katika majimbo yao na kuhakikisha kuwa hakuna mgombea anayepita bila kupingwa.
"Kama katika mazingira ya maboresho ya sheria hizi za uchaguzi Chadema wanataka kususia uchaguzi ujao, huo ni uamuzi wao, lakini uchaguzi utaendelea kwa mujibu wa Katiba, si kwa matakwa ya CCM," alisema.
Aidha, alitetea uamuzi wa CCM wa kumteua Dkt. Samia Suluhu Hassan mapema kama mgombea wa urais, akisema ni uamuzi wa chama na si wa mtu binafsi. Aliwataka wapinzani kutambua kuwa Chadema haina maandalizi wala rasilimali za kushiriki uchaguzi mkuu, na iwapo watasusia, hilo litakuwa anguko lao kisiasa.
Alisema, "Endapo Chadema itaendelea kususia uchaguzi, inaweza kupoteza kabisa nafasi yake kama chama kikuu cha upinzani nchini."
"Najua kesho watakuwa hapa Iringa na kama kawaida yao watakuja kututukana. Mimi nasema niko tayari kubeba matusi kwa niaba ya CCM, leteni mawe kwangu, nipo tayari," alisema kwa ujasiri.
Katika hatua nyingine, aliyekuwa Katibu wa Chadema Jimbo la Iringa Mjini, Paschal Chibala, amejiunga na CCM. Akipokewa na Makalla katika mkutano huo, Chibala alizungumzia maendeleo makubwa yaliyoletwa na Rais Dkt. Samia Suluhu Hassan mjini Iringa na Tanzania kwa ujumla, akisema ni sehemu ya sababu iliyomvutia kujiunga na CCM.