Jijini Dar es Salaam, kitovu cha biashara na uchumi wa Tanzania, kumeandikwa ukurasa mpya wa kiutawala kufuatia kuzinduliwa kwa Baraza jipya la Madiwani la Jiji hilo. Katika kikao hicho cha kwanza kilichofanyika Desemba 4, 2025, hali ya hewa ilijaa hamasa na matumaini mapya, huku Mkuu wa Wilaya ya Ilala, Mhe. Edward Mpogolo, akiweka bayana kuwa "muda wa siasa umekwisha, sasa ni kazi tu."
Akihutubia madiwani hao wapya waliobeba dhamana ya mamilioni ya wakazi wa jiji hilo, DC Mpogolo hakumung’unya maneno. Aliwataka viongozi hao kuvua majoho ya ubinafsi na kuvaa gwanda la utumishi uliotukuka ili kutimiza maono makubwa ya Rais wa Jamhuri ya Muungano wa Tanzania, Dkt. Samia Suluhu Hassan.
"Jiji hili ndiyo taa ya Tanzania. Nyinyi ndio mnaotegemewa kuwasha hiyo taa iwake vizuri. Ninawaagiza mshikamane, muwe kitu kimoja kama chanda na pete. Mkurugenzi na watendaji wote, tambueni kuwa nyinyi ndio injini ya maendeleo hapa. Hakuna nafasi ya kuvutana mashati, tunataka matokeo," alisisitiza Mpogolo kwa sauti ya kishindo.
Kiongozi huyo wa Wilaya aliwakumbusha madiwani kuwa nafasi walizopata si kwa ujanja wao au nguvu zao binafsi, bali ni mpango wa Mungu na imani ya wananchi. Hivyo, aliwataka kutumia Ilani ya Chama Cha Mapinduzi (CCM) kama dira na mwongozo wa kutatua kero za wananchi, kuanzia miundombinu mibovu, usafi wa mazingira, hadi huduma za afya.
"Safu ya uongozi sasa imetimia. Kilichobaki ni 'site'. Nendeni mkafanye kazi, wananchi wanataka kuona mabadiliko, wanataka kuona kodi zao zikifanya kazi," aliongeza Mpogolo.
Katika kuitikia wito huo wa kazi, Mkurugenzi wa Halmashauri ya Jiji la Dar es Salaam, Bw. Elhuruma Mabelya, amekuja na mpango mkakati wa kutetemesha akaunti za jiji hilo. Mabelya ameapa kufanya kazi usiku na mchana ili kuhakikisha hadhi ya Dar es Salaam inarudi na kupaa juu zaidi.
Ajenda kuu ya Mkurugenzi huyo ni kwenye 'mkwanja'. Amesema kwa sasa mapato ya jiji ni takribani Shilingi Bilioni 132, kiwango ambacho anaamini bado ni kidogo kulinganisha na fursa zilizopo.
"Tumejipanga kimkakati. Hatulali, hatupoi. Lengo letu ni kuhakikisha tunavuka haya mapato ya sasa mara dufu. Tunataka mapato yawe makubwa ili tutekeleze miradi ya maendeleo kwa kasi ambayo Rais Samia anaitaka," alitamka Mabelya kwa kujiamini. Hii inamaanisha jiji hilo linajipanga kukusanya zaidi ya Shilingi Bilioni 264 katika kipindi kijacho, jambo litakalohitaji ubunifu na udhibiti mkali wa makusanyo.
Kwa upande wake, Meya mpya wa Jiji la Dar es Salaam, Mhe. Nurdin Juma, ametoa kauli iliyowafurahisha wengi, akijipambanua kama kiongozi asiyeyumbishwa. Meya Juma amesema yeye hatakuwa 'kibaraka' wa mtu au kikundi fulani, bali atakuwa mtumishi wa wakazi wote wa Dar es Salaam.
"Sitakuwa Meya wa mtu, nitakuwa Meya wa Jiji la Dar es Salaam. Nitahakikisha sheria, kanuni na taratibu zinafuatwa bila kumuonea mtu wala kumpendelea mtu. Tuko hapa kujenga, siyo kubomoa," alisisitiza Meya Juma.
Baraza hili jipya linaangaliwa kwa jicho la karibu na wakazi wa Dar es Salaam ambao wamekuwa na kiu ya muda mrefu ya kuona jiji lao likiwa safi, lenye mpangilio, na lisilo na kero sugu za mafuriko na msongamano.