Mgombea Urais wa Tanzania kupitia Chama cha Wakulima (AAFP), Kunje Ngombale Mwiru, ametoa ahadi nzito kwa wakazi wa Ruvuma akisema atamaliza kero zote zinazoikabili Soko Kuu la Songea ndani ya siku 90 tu za utawala wake, endapo atachaguliwa kuongoza nchi.
Akihitimisha kampeni zake mkoani Ruvuma kwa kutembelea soko hilo jana, Mwiru alionyesha kuguswa na mazingira mabaya wanayofanyia kazi wafanyabiashara. Alisema ni aibu kuona miundombinu mibovu, huku baadhi ya wafanyabiashara wakilazimika kufanya shughuli zao chini ya vumbi, ilhali serikali ipo.
"Mkinichagua, ndani ya siku 90 nitazenge soko lote. Haiwezekani saraji ipo, halafu baadhi ya wafanyabiashara wanafanyia shughuli zao chini ya vumbi," alisema Mwiru, akisisitiza hatua za haraka za ujenzi.
Mbali na kero za soko, mgombea huyo ambaye chama chake kimejikita katika masuala ya kilimo, aliahidi kushughulikia changamoto sugu zinazowakabili wakulima nchini. Changamoto hizo ni pamoja na uhaba wa mbolea na ukosefu wa masoko ya uhakika ya mazao yao.
Mwiru aliwaomba wananchi kumpa kura yao Oktoba 29 ili aweze kushirikiana nao moja kwa moja kutatua matatizo. Aliahidi kuwa chini ya uongozi wake, wakulima na wafanyabiashara watakuwa huru kufanya kazi zao na kunufaika na jasho lao. Alisisitiza dhamira yake ya kufika hadi mashambani kujionea hali halisi ya kilimo na kupata maoni ya moja kwa moja kutoka kwa wakulima.
Akielekea mikoa ya Njombe na kisha Mbeya, Mwiru alitoa kauli tata dhidi ya mafisadi, akiahidi hatua kali dhidi yao, ikiwemo "kufuga mamba Ikulu watakaowatafuna wala rushwa." Kauli hii inaonyesha dhamira yake ya dhati ya kupambana na vitendo vya rushwa na ufisadi nchini.