Wakati joto la kura za maoni ndani ya Chama Cha Mapinduzi (CCM) likipanda kuelekea kikao cha mchujo cha Kamati Kuu Julai 19, wingu zito la rushwa limetanda, huku Taasisi ya Kuzuia na Kupambana na Rushwa (TAKUKURU) ikianzisha msako mkali nchi nzima na tayari ikiwa imewahoji watia nia kadhaa.
Taarifa kutoka maeneo mbalimbali nchini zinaonyesha kuwepo kwa kile kinachoonekana kama "bei" isiyo rasmi ya kura. Katika Mkoa wa Rukwa, hasa Jimbo la Sumbawanga Mjini, inadaiwa kuwa baadhi ya wajumbe wamepanga viwango vyao, ambapo ili mgombea ubunge apate kura, anapaswa kuandaa "fungu la maana" la kati ya Shilingi 50,000 na 100,000 kwa kila mjumbe.
"Sasa hivi tumejipanga, huna Shilingi 50,000 hadi 100,000 usitarajie kupigiwa kura. Wagombea wajiandae," alidai mjumbe mmoja ambaye ni Mwenyekiti wa mtaa wilayani humo, akiongeza kuwa hata mgombea akitoa kiasi kidogo, watachukua fedha lakini kura yake hatapata.
Wakati wajumbe wakijipanga, TAKUKURU nayo haijalala. Katika Mkoa wa Kilimanjaro, Mkuu wa taasisi hiyo, Mussa Chaulo, amethibitisha kuwa tayari wamewahoji watia nia 11 wa ubunge kutokana na malalamiko ya rushwa. Alisema ripoti za uchunguzi wao zitawasilishwa kwa vyama vya siasa kabla ya uteuzi wa wagombea kufanyika.
"Tunaendelea kuyachakata malalamiko 11 tuliyoyapokea. Tunafahamu kipindi hiki wengine hutengenezeana tuhuma, hivyo tunafanya kazi kwa umakini mkubwa," alisema Chaulo.
Hali kama hiyo imeripotiwa pia katika mikoa ya Mbeya na Dodoma, ambapo TAKUKURU imethibitisha kupokea malalamiko mengi na imeonya kuwa haitasita kumchukulia hatua mtia nia yeyote, bila kujali chama chake, atakayebainika kujihusisha na vitendo vya rushwa.
"Wananchi mkumbuke, kiongozi mnayemchagua atakuwa madarakani kwa miaka mitano. Msikubali kupokea Sh. 20,000 mkachagua mtu asiye sahihi," alionya Mkuu wa TAKUKURU Mkoa wa Dodoma, Christopher Myava.
Wakati TAKUKURU ikiendelea na msako wake, Kamati Kuu ya CCM inatarajiwa kukutana Julai 19 chini ya Mwenyekiti wake, Rais Samia Suluhu Hassan, kuanza mchakato wa kuchambua majina ya wagombea. Huku ripoti za TAKUKURU zikiwa njiani, mchujo wa mwaka huu unatajwa kuwa huenda ukawa na vigezo vikali zaidi vya kimaadili.