Wakati vyama vya siasa vikijiandaa kwa mchujo wa kuwateua wagombea ubunge, Taasisi ya Kuzuia na Kupambana na Rushwa (TAKUKURU) Mkoa wa Kilimanjaro imetangaza kuwa tayari imewahoji watia nia 11 wa nafasi hiyo kutokana na malalamiko ya viashiria vya rushwa yaliyowasilishwa dhidi yao.
Hatua hiyo inaweka mustakabali wa watia nia hao katika hatihati, kwani TAKUKURU imesema itawasilisha taarifa za uchunguzi wake kwa vyama husika kabla ya mchakato wa uteuzi wa mwisho kufanyika.
Akizungumza jana, Julai 15, 2025, katika semina maalum ya mapambano dhidi ya rushwa iliyowakutanisha watia nia wote mkoani humo, Mkuu wa TAKUKURU Mkoa wa Kilimanjaro, Mussa Chaulo, alisema ofisi yake imepokea malalamiko kadhaa na inaendelea na uchunguzi wa kina.
"Tumepokea malalamiko na tumeshaanza kuyafanyia kazi. Hadi sasa, tumewahoji watia nia 11. Tunaendelea kuchakata taarifa tulizonazo ili kubaini ukweli wake," alisema Chaulo.
Aliongeza kuwa TAKUKURU inafahamu kuwa kipindi cha uchaguzi mara nyingi huambatana na njama za kuchafuana, hivyo uchunguzi wao unafanywa kwa umakini mkubwa ili kutofautisha malalamiko ya kweli na tuhuma za kutengenezewa.
"Tunakuwa makini sana kuhakikisha kila tuhuma tunaifanyia kazi kwa undani ili kupata uthibitisho kabla ya kuchukua hatua. Lengo letu ni kuhakikisha tunawasilisha taarifa sahihi kwenye vyama vya siasa kabla hawajafanya uteuzi wao wa mwisho wa wagombea," alisisitiza.
Hatua hii ya TAKUKURU inaongeza safu nyingine ya mchujo kwa watia nia, ambapo sasa mbali na kutafuta ushawishi wa kisiasa ndani ya vyama vyao, watalazimika pia kuwa wasafi mbele ya chombo cha kupambana na rushwa ili kupata fursa ya kuwemo kwenye karatasi ya kura katika Uchaguzi Mkuu ujao.