Mgombea urais wa Jamhuri ya Muungano wa Tanzania kupitia Chama cha Ukombozi wa Umma (CHAUMMA), Ndugu Salum Mwalimu, amepokelewa kwa heshima za kimila na za kipekee katika Jimbo la Maswa Magharibi, Mkoa wa Simiyu, eneo linalojulikana kama ngome ya jadi ya Kabila la Wasukuma.
Katika tukio hilo la kihistoria, Mwalimu alifanywa rasmi kuwa kiongozi wa kiroho na wa kimila kwa kusimikwa kwa kutumia zana za jadi zenye maana nzito za kishujaa na uongozi. Sherehe hiyo iliongozwa na Mgombea Ubunge wa jimbo hilo, Mzee John Shibuda, ambaye pia anajulikana kama mmoja wa wazee wa heshima wa Kabila la Wasukuma. Shibuda aliongoza hafla hiyo kwa kutumia lugha ya Kisukuma iliyochanganywa na Kiswahili, akionesha ishara ya kumkaribisha rasmi Mwalimu katika Sukumaland.
Kiashiria muhimu katika hafla hiyo ilikuwa ni kitendo cha kuchomekwa kwa 'Sime' ardhini. Sime ni moja ya zana za kimila za Wasukuma, na kuchomekwa kwake kulimaanisha uaminifu, ujasiri na heshima kubwa kwa mgombea huyo wa urais. Wenyeji walifafanua kuwa kitendo hicho hufanywa tu kwa mtu ambaye amepewa heshima kubwa, anaaminiwa na kuonekana kama kiongozi jasiri anayeweza kusimamia jamii.
"Kama ilivyokuwa kwa viongozi wakuu wenye hadhi waliowahi kuheshimiwa nchini, leo tumempokea Mwalimu kama mwana wa Sukumaland tunayemwamini na kumkubali," alisema Shibuda, akimtia moyo Mwalimu kwa kutumia mifano ya viongozi wa kitaifa waliopita.
Baada ya kusimikwa, Salum Mwalimu aliwashukuru wakazi wa Maswa kwa mapokezi hayo ya kipekee, akisema Wasukuma ni miongoni mwa watu anaowaheshimu sana kwa upendo, ukarimu na utu wao.
Akitoa ahadi za kisiasa, Mwalimu aliahidi kurudisha heshima ya wakazi hao kupitia sera za uchumi zinazowagusa moja kwa moja. Alisisitiza kuwa, endapo atachaguliwa kuwa Rais, atahakikisha pamba—ambayo ni zao kuu la biashara katika mkoa wa Simiyu—inapata soko la uhakika na lenye bei bora. Aidha, aliahidi kuwa wafugaji wa jamii ya Wasukuma watapata mazingira bora ya kazi zao na mifugo yao.
Mwalimu alihitimisha kwa kuwaomba wananchi wa Maswa na mkoa mzima wa Simiyu kumpa kura ya kishindo kwa Chama cha CHAUMMA, akisisitiza kwamba ajenda yao kuu ni kujenga uchumi ambao unalenga kuinua wananchi wa ngazi zote, wakiwemo wakulima na wafugaji, kwani uchumi unaanza mashinani.