Mwenyekiti wa Jumuiya ya Tawala za Mitaa Tanzania (ALAT), Ndugu Murshid Nzege, ametoa wito kwa madiwani wote nchini kuhakikisha kuwa wanawafikishia wananchi taarifa sahihi na za kina kuhusu maendeleo makubwa yaliyopatikana chini ya uongozi wa Rais Dkt. Samia Suluhu Hassan. Ndugu Nzege amewataka madiwani kuandaa na kuendesha mikutano ya hadhara katika vitongoji, vijiji, na mitaa yao ili kuwaelimisha wananchi juu ya utekelezaji wa miradi mbalimbali ya maendeleo inayotekelezwa na serikali.
Akizungumza na waandishi wa habari jijini Dar es Salaam leo, Ndugu Nzege alieleza kuwa tangu Rais Samia aingie madarakani, kumekuwa na mafanikio makubwa katika sekta mbalimbali muhimu kwa maisha ya Watanzania. Mafanikio hayo ni pamoja na ujenzi wa madarasa mapya, kuajiri madaktari na walimu wapya, pamoja na kuimarisha miradi ya maendeleo inayolenga kuboresha maisha ya wananchi. Alisisitiza kuwa madiwani wana jukumu la msingi la kuhakikisha kuwa wananchi wanaelewa na wanatambua jinsi Ilani ya Chama cha Mapinduzi (CCM) inavyotekelezwa kwa vitendo na kuleta matokeo chanya kwa jamii.
Akitoa mfano halisi, Ndugu Nzege alieleza kuwa katika Halmashauri ya Bukoba, awali kulikuwa na vijiji 94, ambapo vijiji 40 vilikuwa na changamoto ya upungufu wa watendaji. Hata hivyo, kutokana na juhudi za serikali, sasa kila kijiji kina mtendaji wake. Aidha, changamoto ya uhaba wa walimu na wahudumu wa afya imepungua kwa kiasi kikubwa kutokana na ajira mpya zilizotolewa na serikali.
"Serikali imefanya kazi kubwa kuhakikisha kuwa kila kijiji kinakuwa na mhudumu wa afya aliyepata mafunzo maalumu ili kutoa huduma za afya kwa jamii pale inapohitajika," aliongeza Ndugu Nzege.
Pia, alibainisha kuwa wananchi sasa wana uhuru zaidi wa kutoa maoni yao katika halmashauri, huku hali ya kipato cha wananchi ikiongezeka kutokana na maboresho katika mifumo ya masoko nchini. Ndugu Nzege alimpongeza Rais Samia kwa kushughulikia changamoto zilizokuwepo katika halmashauri, ikiwa ni pamoja na ujenzi wa Vyuo vya Ufundi Stadi (VETA) katika kila mkoa, kuboresha stahiki za madiwani, na kuhakikisha kuwa malipo ya mishahara kwa wakurugenzi wa halmashauri yanafanyika kwa wakati.
Mwenyekiti huyo wa ALAT aliwahimiza madiwani kutumia nafasi zao kuendelea kushirikiana na wananchi ili kuhakikisha kuwa maendeleo yanayoletwa na serikali yanawafikia wananchi wote kwa uwazi na ufanisi. Alisisitiza kuwa ushirikiano kati ya madiwani na wananchi ni muhimu ili kufanikisha miradi ya maendeleo na kuboresha maisha ya Watanzania.