Waziri mwenye dhamana na Ofisi ya Rais, Tawala za Mikoa na Serikali za Mitaa (TAMISEMI), Mheshimiwa Mohamed Mchengerwa, ametoa maelekezo muhimu kuhusu madiwani wanaomaliza muda wao. Katika maagizo yake, amemwelekeza Katibu Mkuu wa wizara hiyo, Ndg. Adolofu Ndunguru, kuandika barua kwa wakurugenzi wote wa halmashauri nchini kuwaeleza kuwa vishikwambi (tablets) walivyokuwa wakitumia madiwani havitakiwi kurejeshwa. Sababu kuu ya uamuzi huu ni kwamba vifaa hivyo vina taarifa za siri na za kibinafsi za madiwani, ikiwemo barua pepe na mawasiliano yao.
Mheshimiwa Mchengerwa ametoa pongezi za dhati kwa Wakuu wa Mikoa 26 ya Tanzania Bara kwa usimamizi wao imara katika kutekeleza miradi mbalimbali ya maendeleo, ambayo ni sehemu muhimu ya Ilani ya Chama Cha Mapinduzi (CCM). Kauli hii aliitoa wakati akiongea na madiwani wa Jiji la Arusha kupitia simu ya kiganjani ya Mkuu wa Mkoa wa Arusha, Paul Makonda, akisisitiza umuhimu wa ushirikiano kati ya serikali kuu na serikali za mitaa.
Alikiri kuwa Machi 20, 2025, ndiyo ilikuwa tarehe ya mwisho kwa madiwani wa awamu ya kwanza ya serikali ya awamu ya sita kuhitimisha utumishi wao. Alisisitiza kuwa mafanikio yote yanayoonekana sasa katika utekelezaji wa miradi ya serikali, hasa ile inayosimamiwa na serikali za mitaa, ni matokeo ya juhudi za pamoja za madiwani na serikali kwa ujumla. Alisema wazi kuwa mchango mkubwa wa madiwani katika kusimamia halmashauri kote nchini umeandikwa kwa herufi za dhahabu, kwani wameitumikia nchi kwa uzalendo mkubwa, wakijali maslahi ya Watanzania wote, waishio vijijini na mijini.
Kwa upande wake, Mkuu wa Mkoa wa Arusha, Paul Makonda, amewataka wakurugenzi wa halmashauri zote za mkoa wa Arusha kuhakikisha wanalipa madiwani stahiki zao zote, ikiwemo mafao yao, kwa wakati. Alifafanua kuwa hili ni takwa la kisheria na kuwa changamoto zozote zinazoweza kujitokeza zinapaswa kuwasilishwa katika Ofisi ya Katibu Tawala Mkoa wa Arusha kwa ufumbuzi.
Kuhusu posho za wenyeviti wa Mitaa, Vijiji, na Vitongoji, Makonda ameelekeza ziingizwe moja kwa moja kwenye akaunti zao za benki. Hii ni tofauti na utaratibu wa sasa ambapo posho hizo hutumwa kwenye ofisi za watendaji wa Kata. Pia, amesisitiza kuwa nakala za miradi yote inayotekelezwa katika maeneo yao, kuanzia bajeti ya mwaka wa fedha 2025/2026, zinapaswa kupelekwa kwa viongozi hao ili wawe na uelewa mpana. Aidha, mtendaji yeyote wa serikali anapotaka kutekeleza mradi katika maeneo yao, lazima viongozi hao wapewe taarifa mapema.
Mkuu wa Wilaya ya Arusha, Joseph Mkude, amewahimiza madiwani hao wanaomaliza muda wao kuendelea kuisemea kazi kubwa iliyofanywa na Serikali ya Awamu ya Sita chini ya Rais Samia Suluhu Hassan katika kila kata ya Jiji la Arusha. Amesisitiza kuwa serikali itaendelea kusimamia miradi isiyokamilika, akitolea mfano kivuko kinachojengwa ambacho fedha zake ziko kwenye akaunti ya Kata ya Ferrari. Aidha, ameahidi kutosita kuchukua hatua pale miradi inapoonekana kutelekezwa, kama ilivyodaiwa kwa mkandarasi aliyeondoka bila kukamilisha ujenzi wa korongo huko Osunyai.
Mkurugenzi wa Jiji la Arusha, John Kayombo, aliwataka madiwani wa kata zote 25 waliomaliza muda wao kutumia baraza hilo kuaga na si kuomba miradi mipya. Alisema, "Ageni msiombe miradi, tumieni baraza hili kuagana na kushukuru kwa kukaa katika baraza hili kwa miaka mitano. Tunatamani mrudi kama mlivyo, basi tuwatakie kila la heri."
Wakati huohuo, Meya wa Jiji la Arusha, Maximilian Iranghe, aliwapa fursa baadhi ya madiwani kutoa shukrani zao. Diwani wa Kata ya Themi, Lobora, alilishukuru Jiji la Arusha kwa kutekeleza miradi mbalimbali katika kata yao na kuomba msamaha kwa watendaji waliojisikia vibaya, akisisitiza lengo ni kuhakikisha maendeleo yanapatikana.