Kampeni za mgombea urais wa Zanzibar kupitia chama cha ACT Wazalendo, Othman Masoud Othman, ziligubikwa na simanzi na hisia kali katika kijiji cha Mbuyu Tende, Matemwe, Mkoa wa Kaskazini Unguja. Hali hiyo ilitokea baada ya wakazi, hususan wazee, kushindwa kuzuia machozi yao wakielezea kile walichokiita uporaji wa ardhi takatifu za urithi kutoka kwa mababu zao.
Mbele ya mgombea huyo, wananchi hao walieleza kwa uchungu jinsi maeneo yao ya asili, ambayo yalikuwa tegemeo kwa kilimo na makazi, sasa yamechukuliwa na kumilikishwa kwa wawekezaji wageni. Walidai kuwa cha kusikitisha zaidi, miradi ya hoteli iliyojengwa kwenye ardhi hizo haijawanufaisha kwa lolote, kwani hata fursa za ajira zinatolewa kwa watu kutoka nje ya maeneo yao, na kuwaacha wazawa wakiwa watazamaji.
Kilio chao hakikuishia kwenye ardhi pekee. Walieleza kuwa hata uhuru wao wa kutumia rasilimali za bahari sasa umewekewa mipaka. Sehemu za bahari, ambazo zilikuwa zikitumiwa kwa shughuli za uvuvi za jadi, sasa zimekuwa maeneo ya marufuku yanayolindwa na askari wenye silaha. "Tumegeuzwa kuwa wageni katika nchi yetu wenyewe. Tumenyang'anywa ardhi, tumekosa ajira, na sasa tunazuiwa baharini. Hii ni dhulma kubwa," alisikika akisema kijana mmoja kwa hasira, kauli iliyoungwa mkono na wenzake.
Akijibu malalamiko hayo yaliyojaa hisia, Othman Masoud aliwahakikishia wananchi hao kuwa matumaini ya kupata haki hayajapotea na ukombozi wao unakaribia. Aliahidi kuwa serikali atakayoiunda haitaruhusu tena ardhi ya Mzanzibari ichukuliwe kwa visingizio vya uwekezaji usiokuwa na tija kwa umma.
"Nawahakikishia, hakuna tena dhulma ya ardhi itakayovumiliwa. Hakuna tena Mzanzibari kunyimwa fursa ya ajira katika nchi yake. Nchi hii ni yetu sote na rasilimali zake lazima ziwafaidishe wananchi kwanza," alisisitiza Othman Masoud. Aliongeza kuwa serikali yake itasimamia uwekezaji rafiki, unaoheshimu utu na utamaduni wa Wazanzibari, na kuhakikisha wazawa wanapewa kipaumbele katika kila nyanja ya uchumi. Alihitimisha kwa kusema, "Tutaijenga Zanzibar mpya yenye usawa, haki na inayomjali mwananchi wake."