Mwanaharakati maarufu na kada mwandamizi wa Chama cha ACT-Wazalendo, Queen Julieth Lugembe, amejitosa rasmi kwenye kinyang’anyiro cha ubunge katika Jimbo la Ubungo baada ya kuchukua fomu ya kugombea kuelekea Uchaguzi Mkuu unaotarajiwa mwezi Oktoba. Hatua hii inaashiria nia yake ya dhati ya kuwatumikia wananchi wa Ubungo kwa uwazi na uaminifu usio na shaka.
Akizungumza baada ya kukabidhiwa fomu hiyo kutoka Ofisi za Tume Huru ya Taifa ya Uchaguzi (INEC), Lugembe alieleza kuwa lengo lake kuu ni kushirikiana na wananchi wa jimbo hilo kutafuta suluhisho la kudumu kwa changamoto zinazowakabili. Alisisitiza kuwa licha ya Ubungo kuwa na shida nyingi, pia ni eneo lenye fursa kubwa za maendeleo zinazohitaji kubainishwa na kutumiwa ipasavyo kwa manufaa ya wote. Mbali na changamoto za miundombinu kama barabara na maji, jimbo hilo linalokaliwa na watu wa tabaka mbalimbali lenye soko kubwa la biashara na ajira, pia linakabiliwa na uhaba wa huduma za kijamii kama shule za kutosha na vituo vya afya. Lugembe anaamini uwepo wake bungeni utasaidia kuzitatua na kuzitafutia ufumbuzi wa kisera.
Uchukuaji wa fomu za wagombea unaendelea kote nchini chini ya usimamizi wa INEC, kuanzia Agosti 14 hadi 27, mwaka huu, na unashuhudiwa ushiriki mkubwa wa wagombea kutoka vyama mbalimbali. Uamuzi wa Lugembe kugombea ubunge unamweka katika mstari wa mbele kukabiliana na wagombea wengine wenye nguvu kutoka vyama tofauti vya siasa. Jimbo la Ubungo limekuwa likitazamwa kama uwanja wa vita vya kisiasa, hasa kutokana na ushindani mkali uliopo katika jiji la Dar es Salaam. Uchaguzi wa mwaka huu unatarajiwa kuwa na upinzani mkali, kwani kila mgombea atajitahidi kuwashawishi wapiga kura kuwa ndiye anayefaa kuwawakilisha.
Chama chake cha ACT-Wazalendo kimekuwa kikisisitiza umuhimu wa maadili mema ya uongozi, utawala bora, na maendeleo shirikishi, ambayo ni msingi wa sera zao. Wagombea wao wanatarajiwa kuzingatia kanuni hizi ili kuleta mabadiliko ya kweli kwenye jamii. Lugembe amejipanga kutumia jukwaa la ACT-Wazalendo kuwafikia wananchi wa Ubungo na kuwaonyesha ni jinsi gani anayeweza kuwakilisha vyema matakwa yao.